【巴塞隆拿一日遊】10個巴塞隆拿市區必去必食的巴塞隆拿旅遊好去處

【巴塞隆拿自由行必去景點】講起巴塞隆拿都會諗起世界級足球隊伍：巴塞隆拿。但去巴塞隆拿自由行除咗睇西甲之外，更重要係睇……實自己啲財物。巴塞隆拿除咗足球，其實旅遊景點都非常豐富，有唔少世界文化遺產，亦可以欣賞當代藝術家，好似高第、畢卡索等作品。巴塞隆拿市中心都有唔少旅遊景點，交通亦非常方便，即刻睇吓巴塞隆拿市中心十個必去必食嘅巴塞隆拿旅遊好去處啦！

1. 巴塞隆拿好去處：桂爾公園 Park Güell

門票優惠：立即購買

桂爾公園絕對係我哋覺得巴塞隆拿最靚嘅地方！桂爾公園本身嘅規劃係一個住宅區，更請嚟著名建築師高第設計，但因為資金問題，最後並未完成所有項目。桂爾公園色彩繽紛，好似進入咗一個童話世界，勁多打卡點！另外，因為桂爾公園位處山坡上，天氣好嘅時候，仲可以飽覽整個巴塞隆納市中心嘅景色！

2. 巴塞隆拿好去處：聖家堂 Sagrada Família

門票優惠：立即購買

要數巴塞隆拿嘅地標當然就係聖家堂啦！聖家堂係建築師高第設計，由1882年動工，但因為資金、戰爭等原因，直到依家都未完工。而聖家堂除咗係高第嘅最後一件作品，更係世界上唯一未完工就被列為世界遺產嘅建築物。聖家堂嘅設計充滿自然色彩，並融入《聖經》嘅各個場景，而聖家堂外面分為三個立面：東面係耶穌誕生、西面係耶穌受難、南面係天國嘅榮耀，每個立面都有四個鐘樓，象徵耶穌嘅12個門徒。

3. 巴塞隆拿好去處：米拉之家 Casa Milà

門票優惠：立即購買

巴塞隆拿有唔少高第嘅作品，另一個著名嘅建築物就係米拉之家。米拉之家以曲線同不規則狀嘅石材砌成，外型好似一舊大岩石。細心啲睇，就會發現雀仔、荷花等抽象造型呀！

4. 巴塞隆拿好去處：巴特略之家 Casa Batlló

門票優惠：立即購買

巴特略之家係米拉之家附近，亦係另一個高第嘅名作。巴特略之家嘅建築設計以海洋為主題，外面好似鋪上魚鱗片，非常獨特。

5. 巴塞隆拿好去處：桂爾宮 Palau Güell

門票優惠：立即購買

桂爾宮係高第早期嘅作品，所以同其他色彩繽紛嘅建築作品好唔同。桂爾宮有四層樓、頂樓天台及地下室，就咁睇門面好似好普通，但天花板非常華麗，帶點東方色彩，鑲嵌唔同嘅雕刻，打造別出心裁嘅奢豪。

6. 巴塞隆拿好去處：蒙錐克纜車 Castell de Montjuïc

門票優惠：立即購買

纜車嘅目的地就係蒙錐克古堡，依家活化成為西班牙嘅軍事博物館，展出大量軍事武器同軍服。不過，就算無興趣入去蒙錐克古堡參觀，坐蒙錐克纜車亦都好值得，全程纜車嘅時間大概係10分鐘，但可以飽覽整個巴塞隆拿嘅景色！

7. 巴塞隆拿好去處：凱旋門 Arc de Triomf

除咗法國，喺巴塞隆拿都有一座凱旋門。巴塞隆拿凱旋門1888年建成，以紅磚為主要顏色，糅合咗伊斯蘭、古羅馬以及哥德式建築嘅特色。呢座凱旋門唔係因為戰爭而興建，主要係因為歡迎嚟自世界各地嘅遊客參加1888年世界博覽會。

8. 巴塞隆拿好去處：Mercat de la Boqueria

Mercat de la Boqueria係一個位於鬧市嘅街市，街市入面超過100間商店，除咗生肉、海鮮同蔬菜，街市入面亦有唔少地道小食店，想試西班牙嘅傳統小食就絕對唔可以錯過。

9. 巴塞隆拿好去處：魔幻噴泉 Font Màgica

魔幻噴泉係1929年因為巴塞隆拿世界博覽會而興建，依家每晚都有音樂噴泉表演，想佔據有利位置嘅話，就建議早啲去到魔幻噴泉喇！

10. 巴塞隆拿好去處：El Nacional

位於加泰隆尼亞廣場隔離嘅El Nacional，係一間人氣打卡美食廣場！El Nacional入面有4間西班牙菜餐廳，主打肉、海鮮、Tapas以及輕食，價錢唔貴，但每一間都大排長龍架！想食西班牙海鮮飯、西班牙辣肉腸、海鮮拼盤等等都有，真係非常滿足。

世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–

巴塞隆拿 Barcelona

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com