Outdark：來自釜山的韓式炸雞熱潮

你喜歡韓國炸雞嗎？每次見到韓劇嘅主角食緊脆卜卜嘅炸雞，就會諗起呢間嚟自釜山嘅過江龍：Outdark。Outdark由一間外賣炸雞店，逐步發展成主打Fusion嘅韓式料理餐廳。品牌進駐香港後，至今仍極受歡迎，餐廳除咗炸雞之外，仲有唔少特色韓式美食呢！

Outdark：柚子米酒

食韓國菜，梗係要飲埋米酒，咁先Perfect！Outdark提供多款味道選擇，有原味、蜂蜜、蘋果、芒果、士多啤梨、柚子同西瓜味。我哋揀咗柚子味，好易入口，又夠凍，冰感十足，酒精濃度只有 5%，啱晒我！

Outdark：甜辣炸雞+香蒜蜜糖炸雞

嚟Outdark，識食梗係食炸雞啦！雙拼炸雞可以自選口味，我哋揀咗甜辣炸雞同香蒜蜜糖炸雞。炸雞新鮮炸起，非常香口，外脆內嫩，啖啖肉。甜辣炸雞唔算好辣，甜味仲重；香蒜蜜糖炸雞有好香蒜味之外，仲有陣陣蜜糖香，味道好有層次。炸雞分量十足，堆到成座山咁高，仲配上醃蘿蔔同四款醬汁：醬油、芥辣、甜辣醬同辛辣醬，令味道層次都有唔同選擇。另外，仲有加咗牛油蜜糖粉嘅粗薯條同薯格，真係好惹味！

Outdark：鍋巴海鮮湯

食煲仔飯就梗係要有飯焦啦！而呢個鍋巴海鮮湯就係主打飯焦嘅湯飯，湯底用上蝦、蜆、魷魚等海鮮熬製，非常鮮甜！海鮮同飯焦都非常香口，索咗湯後，就好似食緊油炸鬼咁，但如果鍾意脆卜卜就要快啲食喇！

Outdark：豬肉炒粉絲

豬肉炒粉絲嘅份量同樣十足，炒到熱辣辣，粉絲煙韌Q彈，勁香又入味！

Outdark：DIY飯團

由大量紫菜蓋住用麻油撈過嘅白飯，想佢變成一粒粒嘅飯團就要自己DIY喇！製作成波嘅飯團充滿麻油嘅香味，加上紫菜嘅鹹香同口感，真係有得玩又有得食呀！

Outdark：基本資料

餐廳名稱：Outdark
地址：旺角彌敦道613號飛達商業中心2樓

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！

Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com