寮國自由行 永珍三大必遊景點

喺剛過去嘅假期，A姐話要飛番轉，但又嫌日韓台泰未夠新意，所以短短4日3夜由佢話事，結果我跟咗A姐去寮國（老撾）。我真係發夢都無諗過我會有個想去寮國嘅女朋友！寮國嘅面積其實同大不列顛島（英格蘭+蘇格蘭+威爾斯）差唔多，不過，寮國就係一個以農業為主嘅內陸國家。一般去寮國旅行嘅人通常都離不開呢三個城市：永珍（萬象）、萬榮、龍坡邦。不過，今次時間所限，我哋就主打佢嘅首都：永珍。

「如果寮國同永珍無聽過，咁老撾同萬象，應該有吧？前者係台灣譯音，而後者則為中國譯音。因為我哋細個讀書同睇地圖都係跟台灣譯名，所以仍習慣叫寮國及永珍」

除咗玩，寮國仲有咩好味，永珍七大必食推介，詳情請睇：https://wp.me/p8vzXP-4w8

前段提及，一般去寮國旅行嘅人主要都係去永珍、萬榮同龍坡邦。當中最有名氣一定係被列入世界遺產城市嘅龍坡邦。而作為首都嘅永珍一般只係作為大家寮國之旅嘅中轉站，但其實永珍都有唔少景點，我哋建議逗留時間最少為兩日兩夜，而以下三個景點就係我哋嘅必遊推介。

第一站：凱旋門

寮國首經被法國殖民，直到1954年獨立，而凱旋門就係為咗慶祝國家獨立而建立。寮國凱旋門嘅外型同法國嘅凱旋門好相似，而永珍凱旋門就富有寮國特色，牆上雕有唔同嘅神話同佛像，而頂層仲有幾個塔，好有亞洲特色。我哋就建議日景同夜景都要嚟睇睇。

而入場費亦係驚喜價，旅客每位只需3,000Kip（約HK$2.6）就可以登上塔頂！而永珍市中心因為唔多高樓大廈，所以7層樓高嘅凱旋門已經可以360度睇到整個永珍市。

除咗驚喜，仲有驚嚇，因為凱旋門入面有2層嘅shopping mall，賣嘅都係寮國紀念品，價錢唔平架。想買紀念品，可考慮到Morning Market。

凱旋門 Patuxay
地址：https://goo.gl/maps/Patuxay
入場費：3,000Kip（約HK$2.6）
營業時間：08:00-16:00

第二站：香昆寺

香通寺又稱為佛像公園，除咗可以經Klook參加local tour（萬象香昆寺 & Carol Cassidy’s Lao紡織品中心半日導覽），亦可以自行前往。只要喺Morning Market旁邊嘅巴士站上坐14號巴士，即可到達，但要留意巴士班次喇，錯過咗就有排等，而我哋好好彩，去程同回程都只係等咗2分鐘。

坐巴士大概一個鐘車程就會到達，香通寺由一位叫Bunleua Sulilat喺1958年開始興建。裡面有唔同嘅佛教雕像，而最出名就係一入門口就見到嘅三層建築。外表係一個球型，要入去先要進入一個惡魔頭嘅口，見到表示地獄嘅球體內部，不斷向上爬，代表經歷唔同嘅地獄過程，最後登上代表天堂嘅最高點。

香昆寺 Buddha Park
地址：https://goo.gl/maps/BuddhaPark
入場費：15,000Kip（約HK$13）
營業時間：08:00-17:00

第三站：塔鑾

塔鑾係寮國嘅舍利塔，入面放咗舍利子。而塔鑾嘅底層四面建有4座膜拜亭，第二層建有30座小塔，象徵佛祖嘅30種恩澤，外面貼滿了金箔，好靚又唔係土豪金，係嚟到寮國咁多個景點，我哋最鍾意嘅一個。亦係寮人嘅文化象徵，所以寮國人民對塔鑾非常尊敬，亦係寮國嘅地標之一。要去塔鑾同樣可以坐巴士，但我哋今次就叫咗Loca嚟坐（寮國版Uber）。

塔鑾 Pha That Luang
地址：https://goo.gl/maps/PhaThatLuang
入場費：10,000Kip（約HK$8.8）
營業時間：08:00 – 12:00；13:00 – 16:00

除咗玩，寮國仲有咩好味，永珍七大必食推介，詳情請睇：https://wp.me/p8vzXP-4w8

想知寮國（老撾）仲有咩抵玩推介？詳情請睇：https://wp.me/p8vzXP-6G

因為香港飛寮國係無直航機，所以今次我哋坐越南航空經河內飛到永珍。
提提你：持有BNO或特區護照前往寮國均需簽證（越南轉機而不入境則可免簽證）

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com