[香港Staycation] 西區日落美景 香港萬怡酒店
Staycation喺外國一早就已經流行，意思係指喺自己國家或城市度過假期，唔洗舟車勞頓、唔洗趕行程、輕輕鬆鬆，畀自己休息一吓！今次我哋Staycation就嚟到位於西營盤，屬於萬豪國際 Marriott International 旗下嘅香港萬怡酒店 Courtyard by Marriott Hong Kong，嚟一個「美饌 · 美夢」住宿計劃 Gourmet Break Package，包自助早餐同晚餐，再加紅酒一支。酒店設施雖然唔多，但附近有唔少特色cafe，仲可以去西環泳棚或西環碼頭欣賞吓日落美景，又或者好似我哋咁喺間房度欣賞吓無敵海景，享受屬於我哋嘅時間。
預訂網址：www.trip.com
酒店大堂
酒店位於西環西營盤，由西營盤港鐵站B3出口，行5分鐘就到喇，交通位置非常方便。酒店嘅大堂當然唔少得體溫檢測，以確保大家入住安全，而大堂亦設有MoMo to Go，方便大家購買日用品、小食同飲品。我哋今日係平日入住，所以住客唔多，唔洗排隊就可以直接check-in喇！
客房區域
酒店樓高32層，我哋今次入住嘅係位於29樓嘅行政港景特大床房（Executive Harbour King），一入房間，就畀呢個海景吸引住。因為平時嘅海景主要係維港兩岸景色，好似係中環至銅鑼灣嘅高樓大廈，又或者係尖沙咀至郵輪碼頭嘅天際線，但由於酒店位處西區，而我哋房間又對正西面，睇到醉人嘅日落景色呀！另外，因為今日萬里無雲，仲可以遠眺青馬大橋同愉景灣添。
至於雙人床夠晒大，床褥屬於適中偏軟，床單好柔軟。枕頭總共有4個，兩個較軟，兩個較硬，真係好舒服呀！雙人床面對住海景，臨瞓前欣賞吓夜景真係唔錯！最值得一讚係個窗簾，遮光度一流，第二朝完全瞓到自然醒，唔會畀陽光騷擾。
床嘅兩邊都有插頭，方便大家充電，亦有JBL智能鬧鐘，有兩個USB充電位，仲可以用藍芽接駁電話播放音樂，音質相當唔錯。
另外，客房區域內亦設有書檯，正對住海景，夠晒開揚。旁邊亦有USB插頭同萬用插頭，方便大家使用。
房間內亦設有mini bar，免費提供蒸餾水、茶包同咖啡包。衣櫃內仲有保險箱、拖鞋、熨衫板同熨斗等，夠晒貼心！
浴室區域
浴室簡簡單單，光猛整潔，呢個房種係企缸，範圍都唔細。至於沐浴用品係使用酒店自家品牌，我覺得味道都算唔錯，但如果用唔慣就記住自行準備喇！至於其他個人用品都齊全，包括：剃鬆刀、牙刷、梳等等。
健身室
酒店設有健身中心，可以邊跑步邊欣賞對岸景色。
餐飲服務
酒店嘅餐廳係MoMo Cafe，今次我哋就試咗佢個意式放題晚餐（詳情按此）。
MoMo Cafe：自助早餐
今次我哋呢個Staycation Package包埋喺MoMo Cafe食自助早餐，食物種類尚算豐富。
我特別欣賞佢個中式點心，選擇有燒賣、珍珠雞、牛肉球、叉燒包、奶黃包同雞包仔。
最正係仲有egg station，可以即叫即煎新鮮雞蛋；麵檔連公仔麵都有，可以整番碗腸蛋麵。
此外，仲有粥、炒麵、茄汁豆、腸仔、煙肉、乳酪、沙律同果汁等。我亦十分鍾意佢嘅水果選擇好多，仲可以自製茶包，呢個早餐確實唔錯呀！
世界各地／香港景點門票邊度買至平？
–> 詳情請睇：https://wp.me/p8vzXP-6G <–
香港萬怡酒店 Courtyard by Marriott Hong Kong
地址：香港西營盤干諾道西167號
預訂網址：www.trip.com
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
