[香港Staycation] 全港最高嘅室外泳池 音樂主題香港W酒店
W酒店以音樂同party為主題，玩味十足，勁多打卡位，加上係萬豪酒店集團嘅成員，W酒店成功吸引一班年輕忠粉，當然包括我同A姐啦！香港嘅W酒店更設有全港最高，位於海拔211米嘅露天無邊際泳池，可以邊游水邊俯瞰西維港海岸嘅景色，就啱時間睇埋黃昏日落美景就更加完美，所以作為潮人點都要嚟香港W酒店玩Staycation啦！
預訂網址：www.trip.com
酒店大堂
由港鐵東涌線九龍站行去香港W酒店大概5分鐘，而由港鐵屯馬線柯士甸站行去香港W酒店亦只係大概15分鐘，加上接鄰機場快線同高鐵，交通位置真係非常優越。加上香港W酒店樓下就係大型商場：圓方（Elements），食嘢買嘢都非常方便！如果帶小朋友嚟嘅，不妨順路去埋附近嘅M+博物館同Sky100參觀，自製兩日一夜staycation嘅行程啦！
一踏入香港W酒店，就會俾大大個變色嘅W字所吸引，特別係夜晚，配埋音樂，真係好似去咗party，好有feel架！香港W酒店嘅酒店大堂喺6樓，提供免費報紙同welcome drink，加上員工親切嘅笑客，有效率嘅check-in，真係令我哋留下深刻嘅印象。今日嘅住客可能唔多，所以員工仲帶埋我哋上房，嚟個簡單嘅room tour同介紹酒店嘅設施。
客房區域
其實一出lift就已經係打卡位，因為電梯大堂設計到好似圖書館，同樓下嘅party氣氛截然不同，令人有一種party過後，營造一個休閒舒適嘅住宿空間。
香港W酒店總共有393間客房同套房，我哋今次就入住位於33樓嘅Wonderful Room，房間嘅空間感十足。雙人床好大張呀，唱住金絲雀碌嚟碌去都得。床褥屬於中等偏軟，而且床單同被鋪都好滑好舒服；至於枕頭總共有4個，2個軟2個硬，仲有兩個後備放喺衣櫃，總有一個啱你心水，陪你入眠。不過，A姐嘅枕頭選擇就一定係我個膊頭同臂彎啦。
兩邊嘅床頭都有床頭櫃，一邊有藍牙喇叭，仲可以無線叉電，所以就算唔記得帶充電線都夠晒方便。另外，房間亦設有多個充電位及USB充電位，整體嚟講，充電係夠晒方便。至於房間嘅電視機為40吋LED高清電視，提供37個免費頻道，仲可以連接電話，睇Netflix、Youtube等都得，可以同M佬攤喺度慢慢煲劇啦！
房間嘅景觀面向凱旋門等內園景觀，仲有少少海景，睇到維港對岸。至於窗簾遮光一流，房間隔音唔錯，所以睡眠質素一流。而窗簾同燈光控制喺床邊，可以邏擇預設嘅模式，好似朝早可以開「Day」、夜晚就開「Night」、而瞓覺就當然係「Dream」。香港W酒店唔係主打商務旅客，所以工作區域唔算好大，但基本文具都非常齊全。嚟Staycation嘅小朋友，可以喺香港W酒店做功課啦（誤）！房間當然唔少得衣櫃、保險箱、拖鞋同浴袍啦。而房間內嘅mini bar，有免費嘅咖啡同茶包，當然唔少得零食同汽水，但由於W酒店主打Party風，所以房間內嘅酒都唔少，甚至有埋調酒杯，一於整杯Sexy A嘆吓啦！
浴室區域
浴室係A姐最關心嘅地方，有超級大嘅雙洗手台、浴缸、獨立嘅淋浴間同如廁區。呢度嘅浴缸都唔細，用上W嘅品牌：Momo。大家仲可以邊浸浴邊睇電視添！不過由於淋浴間同如廁區嘅門係一個敞鬥，如果我去廁所，而A姐想沖涼，咁就只有其中一邊可以閂門喇。
健身及泳池
香港W酒店亦設有健身室（SWEAT）、泳池（WET）同水療（BLISS SPA）。位於76樓嘅WET係全香港最高嘅室外泳池，仲要係無邊際，畏高嘅真係未必適合喺呢度游水喇！泳池旁邊有好多躺椅，曬吓太陽都好舒服。而旁邊仲有一個室外按摩池，水溫好舒服，加上靚景，疲勞盡失。旁邊仲有個小酒吧（WET® 泳池露台），叫返杯酒就更chill啦。
而健身室（SWEAT）位於73樓，設施都十分齊全。另外，旁邊仲有室內按摩池、芳香蒸氣室同sauna，當然男女係分開架啦。望住園景做室內水療按摩。不過，由於呢度有好多裸男，所以影唔到相喇（疫情期間未必有開放）。
餐飲服務
香港W酒店設有多間餐廳選擇，其中包括：WOOBAR、Kitchen、星宴同FIRE。我哋今日就喺W酒店星宴中餐廳嘆高質點心放題。
詳情：高質點心放題 W酒店星宴中餐廳
世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–
香港W酒店 W Hong Kong
地址：西九龍柯士甸道西1號天璽
預訂網址：www.trip.com
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
