[香港Staycation] 平價冷門伏唔伏 尖東富豪九龍酒店
尖東麼地道一帶有唔少酒店，其中包括呢區最平嘅富豪九龍酒店！其實富豪品牌一直都唔喺我哋嘅bucket list，但今次staycation package價錢低見HK$650，就包行政酒廊同自助早餐，當入去飲吓酒住番晚都唔錯掛！所以喺完全無任何期望之下，一於平有平玩，試吓究竟伏唔伏啦！
預訂網址：www.klook.com
酒店大堂
酒店位於尖東，距離紅磡站或尖東站約10分鐘步程，交通非常方便；而酒店附近亦有超級市場，同勁多餐廳選擇。如果帶小朋友嚟嘅，不妨順便去埋附近嘅香港歷史博物館同科學館參觀，咁呢兩日一夜staycation就夠晒行程豐富啦！
酒店喺1982年開幕，而客房就喺2015年就進行咗一次翻新工程，至於大堂就保留住八至九十年代嘅風格。一如其名，大堂以金色為主調，雖則呢個色調就未能吸引到我，卻表示「金碧輝煌」嘅富豪style。酒店總共有639間客房同套房，由於房數之多，加上酒店亦提供日間住宿及各種優惠，我哋weekend嚟到，checkin真係好多人呀！值得一讚嘅係，我哋14:00嚟到已經可以安排上房，不過，職員同我哋無任何交流，連早餐、wifi、房間樓層等簡單講介亦完全欠奉。
房間區域
Package本身係入住家庭豪華客房，但我哋估計checkin嘅時候，可能upgrade咗我哋（checkin職員完全無提及過），因為我哋入住酒店最高，位於15樓嘅行政樓層客房，驚喜仲有一個海景view添！
房間面積為28平方米，活動空間十足。雙人床屬於King size，床褥偏硬，而枕頭總共有4個，但一定要疊起嚟瞓，因為一個實在太扁喇！窗簾遮光麻麻，朝早會透光入房。床頭除咗有房間燈光控制按鈕，仲有一個藍牙喇叭，可供電話叉電，不過，除此之外，床邊就無仼何插頭位置。
房間嘅書枱以光潔透明嘅玻璃為枱面，旁邊就係mini bar，本身備有兩支蒸餾水、茶包同咖啡包。而我哋今次嘅package亦包括免費mini bar同水果，但由下奏2點入住，直至夜晚11點先送上，而中途所有客房服務熱線都要長響最少5分鐘先有人接聽。另外，我哋喺夜晚10點就曾經致電要求食用冰，但酒店回覆所有冰經已用完！可能係有太多人入住，令所有服務都接近癱瘓，真係辛苦一眾員工。
另外，電視頻道嘅選擇好多，除咗本地電視台，驚喜連平時嘅收費頻道都有！
浴室區域
浴室乾濕分離，設有浴缸，不過，浸浴講求氣氛，整體廁所設施感覺陳舊，所以我哋就無浸喇！至於個人用品方面就只有牙刷、牙膏同浴帽，至於其他用品可以致電詢問，不過，熱線電話確實非常繁忙，就算接通，亦要等待好長時間送上，所以我哋建議自己攜帶啦！反而廁所嘅驚喜位係呢度嘅洗頭水、沐浴露同護髮素竟然用法國嘅ELLE品牌。
另外，房內亦設有衣櫃，提供拖鞋、體重磅、風筒、夾萬同收費嘅洗衫服務。
娛樂設施
酒店內設有小型商場，不過舖頭唔多，而且唔係太適合我哋行。另外，酒店健身室設有跑步機、單車機、啞鈴等等，設備尚算齊全，不過因應疫情期間酒店所實施嘅政策，整個健身室只可以容納四個人，所以如果想用嘅，就要提早去禮賓部預約。
餐飲服務
酒店設有5間餐廳及餅店，我哋今次嘅staycation就包咗自助早餐同行政酒廊服務。
行政樓層貴賓廊
位於酒店一樓，設有小型圖書館、電腦同小型會議室。貴賓廊嘅非Happy Hour時段，僅提供曲奇、茶包、咖啡同汽水，但由於大部分時間都無職員駐場，所以好多時都已經空無一物。至於每日嘅17:00-20:00就係happy hour時段，今日提供嘅食物有泰式魚餅、春卷、兩款三文治、豆腐花同啫喱，但重點當然係酒啦！驚喜嘅呢度除咗啤酒、紅酒同白酒，仲有好多烈酒，包括whiskey、rum、vodka、gin等，可以輕鬆炮製一杯屬於你嘅cocktail啦！此外，除咗茶包、咖啡同汽水，happy hour時段亦提供橙汁同菠蘿汁。
雅廊咖啡室
話說前一晚致電詢問早餐供應時間，職員表示至早上09:30，所以晨早起身落去食早餐，但原來自助早餐供應時間係06:30-10:30。早餐嘅選擇唔算太多，熱食方面有香腸、火腿、薯餅、茄汁豆，可以自製All Day Breakfast；中式選擇就有完全無味嘅豬肉粥、叉燒包、燒賣。另外，仲有水果、多士、牛角包、沙律、乳酪，當然仲有長時間大排長龍嘅egg station。飲品方面，就有橙汁、菠蘿汁、咖啡同茶。整體來講，個早餐確實麻麻，唔會令你食到幾轉。
世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–
富豪九龍酒店 Regal Kowloon Hotel
地址：九龍尖沙咀麼地道71號
預訂網址：www.klook.com
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
