[香港Staycation] 英倫豪華酒店 灣仔The Hari Hong Kong
Staycation成為近期熱門嘅留港節目，有唔少酒店就推出以和風為主題嘅Staycation Package，令港人重拾去日本旅行嘅感覺。不過去咗咁多轉「日本」，A姐就話想有啲新意，所以今次就帶佢去玩玩以英倫為設計主題嘅The Hari Hong Kong啦！The Hari Hong Kong喺2020年12月全新開幕，酒店行英式典雅風格，加上親切殷勤嘅服務同豪華嘅品牌形象，極具時尚型格感，亦令我哋留下一個深刻嘅住宿體驗。依家仲推出開幕優惠，咁就玩得更加抵啦！
預訂網址：www.klook.com
酒店大堂
酒店位於銅鑼灣同灣仔之間，大概步行10-15分鐘，就可以去到灣仔港鐵站或銅鑼灣港鐵站，交通位置非常方便，旁邊就有便利店同好多餐廳！酒店嘅外牆引入植物牆身，加上大門口空間十足，同旁邊嘅繁華鬧市形成強烈對比。至於一踏入酒店大門，禮賓部職員同我哋邊傾計，邊帶我哋去到位於1樓嘅check-in大堂辦理入住手續，由於禮賓部已預先詢問我哋嘅姓名，所以一到達一樓，前台職員就可以直接稱呼我哋：「A姐M佬，歡迎你哋入住」，真係好有親切感呀！
The Hari Hong Kong其實係夏利里拉酒店Harilela Hotels Ltd 旗下品牌，由倫敦室內建築設計公司Tara Bernerd & Partners同創辦人Tara Bernerd親自設計。設計師希望The Hari Hong Kong 就好似一套私人訂制嘅西裝，將英倫風格帶到香港，所以酒店牆身用咗孔雀藍嘅鑲板、琥珀色皮革、灰階大理石同中性紋理亞麻布嘅裝飾，再配合天鵝絨物料，加入藍、綠等色調，充滿英倫風。再細心睇吓，酒店職員嘅制服都充滿英倫風㗎，真係好似去咗英國咁。
另外，喺1樓嘅check-in大堂，仲有一個小小嘅閱讀室，絕對係一個打卡位。
The Hari Hong Kong係全球第二間The Hari品牌嘅酒店，第一間就喺倫敦，位列Tripadvisor倫敦酒店嘅第7位，所以The Hari Hong Kong絕對有信心保證！相信假以時日，The Hari Hong Kong將會佔據Tripadvisor更高嘅位置。整個check-in過程流暢，職員仲幫我哋安排late check-out至1點，咁就可以瞓個靚覺啦！喺入住手續完成後，職員亦親自帶我哋上房，順便講解一吓酒店同房間嘅設施！
客房區域
The Hari Hong Kong樓高30層，設有210間客房，包括位於頂層嘅三間套房，而我哋今次就入住位於21樓，面積323呎嘅Premium Corner Room。由於酒店係2020年12月先投入服務，所以房間設施非常新淨。至於客房嘅景觀主要為灣仔城市景，不過因為我哋住得比較高，而且係corner room，所以就可以眺望金鐘商業區一帶。
一踏入房間，就係衣櫃同半開放式浴室，再行入少少就係臥室區域。雙人床係King size，夠晒大，點碌都得！至於床褥軟硬度適中，床單非常柔軟，枕頭總共有4個，兩個較軟，兩個較硬，加上遮光度一流，瞓得好舒服呀！床嘅兩邊有插頭、USB充電位、燈掣同窗簾開關，非常方便。另外，酒店亦非常智能，可以透過房內嘅電視或電話與房間嘅智能系統連接，只要講一句「開燈」、「開窗簾」，甚至問佢天氣同附近景點都立即解答到你，真正攤喺張床度唔駛郁啦！
喺窗嘅前面就係長長嘅梳化同橢圓形枱，細心位係梳化下邊都有插頭同USB充電位，方便商務旅客。而姐亦好滿意房間嘅燈光，就算夜晚都非常光猛，但如果鍾意柔和燈光嘅你，亦可以按下酒店preset嘅柔和光感。
另外，電視可以調整位置，所以無論坐喺梳化定瞓喺床上面都可以欣賞節目。電視嘅頻道選擇好多，香港本地或世界主要衛星頻道都有，如果都係唔啱睇嘅，亦可以連接至自己嘅手提電話，睇youtube都無問題啦！另外，酒店響應環保，所以酒店嘅資訊同in room services都可以透過電視查閱，而電視亦內置PressReader電子閱讀平台，可以隨時閱覽世界各地嘅報章雜誌。
最後，房間嘅mini bar提供電熱水壺、Acqua Panna礦泉水、斯里蘭卡Dilmah茶包同capsule咖啡。如果想要蒸餾水，亦可以透過room services安排。
浴室區域
為咗增加空間感，浴室採用半開放式設計，並以透明玻璃門將客房同浴室分隔。
酒店選用嘅Mia Kaya品牌嘅毛巾，夠晒軟綿綿，好舒服呀！另外，個人用品亦十分齊全，包括牙刷、牙膏、梳、浴帽、化妝棉等，而洗頭水、沐浴露、護髮素同潤膚露就用La Bottega品牌，味道係The Hari獨有嘅味道，真係好香㗎，A姐表示好想買番支返屋企添呀！另外，浴室內嘅馬桶同企缸分隔，我同A姐出門口時就唔怕爭廁所用啦！
浴室旁邊就係衣櫃，放有浴袍、拖鞋（超舒服）、風筒、電筒、洗衣袋同夾萬。
服務驚喜
喺check-in嘅時候，我哋見到酒店嘅原子筆好靚，A姐細細聲同我講咗句：「支筆好靚呀」，點知轉頭前台職員就送上2支全新嘅原子筆同入住感謝卡俾我哋，實在係太細心同好驚喜呀！
健身中心
酒店嘅3樓設有健身室，不過因為疫情期間，健身室就未有開放。
餐飲服務
酒店設有兩間餐廳，分別係日式餐廳Zoku Restaurant & Terrace同意大利餐廳Lucciola Restaurant & Bar。
我哋嘅午餐就選擇喺酒店嘅Lucciola Restaurant & Bar享用，詳情可睇：灣仔英倫酒店The Hari 嘆意式風味Lucciola Restaurant & Bar。
另外，我哋今次入住亦有包含半自助早餐，用餐位置係Lucciola Restaurant & Bar。我哋各自選擇一個主菜，而bar枱就放有半自助餐嘅食物，可以自取粟米片、生果、果汁、煙三文魚、火腿同麵包等。A姐就特別鍾意個牛角包，夠晒香脆。
至於主菜方面，A姐就揀咗奄列，奄列入面有火腿同芝士，芝士熟度啱啱好，可以拉絲㗎！
而我就揀咗Egg Benedict，流汁嘅蛋黃真係令人好滿足呀！
The Hari Hong Kong
地址：灣仔駱克道330號
預訂網址：www.klook.com
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
