除咗官也街嘅氹仔 五大不一樣的小店

澳門絕對係大家weekend嘅旅遊熱點，去住吓靚酒店，玩番兩手，同A姐去拍吓拖都唔錯。不過，氹仔除咗賭場同官也街，其實仲有咩？氹仔除咗官也街，當然仲有好多特色小店同藝術設施，今日就帶A姐去感受不一樣的……氹仔！

廖文暢作品展：「澳門炮竹行業」

澳門嘅炮竹行業曾經興盛一時，為當時唔少嘅低收入家庭提供大量工作機會，其實喺炮竹工廠工作係非常危險，但為咗養家，只可以頂硬上，因為一唔留神，輕則燒傷皮膚，重則當場喪命。

水彩畫廖文暢大師作品一向都喜歡圍繞探究空間、時間、記憶同人物為題，而今次嘅作品展主題就係描繪鞭炮行業嘅傳統生產過程同周邊嘅人物事。由卑微而危險嘅環境、年輕女性同兒童從事涉及爆炸品嘅工作等等，喚起大家對舊城區嘅傳統記憶同點滴回憶。

廖文暢作品展：「澳門炮竹行業」
地址：氹仔舊城區藝術空間（澳門氹仔木鐸街10號）
營業時間：7月4日至10月5日 12:00-20:00〔逢星期二至星期日〕

澳葡之家 La Famiglia

去澳門點會無食過葡國菜！但越嚟越少見嘅土生葡菜又有無食過呢？其實土生葡菜係澳門土生葡人嘅飲食文化，係將葡萄牙同澳門華人嘅烹調方式融合而成，仲係澳門嘅非物質文化遺產之一。

土生葡菜變化好多，而呢度嘅免治豬肉、肉圍、葡式非洲雞、葡式釀蟹蓋配麵包、里斯本白酒煮蜆、薯絲炒馬介休、安格斯T骨、葡式燒乳豬同海鮮大砂鍋等等。

呢個薯蓉青菜湯，用石鍋上菜，就可以保持湯嘅熱度。湯入面有青菜同切咗絲嘅葡國臘腸，味道好有層次。

為食嘅我哋，叫澳萄式什錦炸小食就最啱，有炸包仔、咖哩角、蝦角、角仔、牛肉卷同馬介休薯波球，樣樣都新鮮熱辣，脆卜卜架，而最驚喜係唔會炸到乾淨淨，又唔太油膩。而我最鍾意就係牛肉卷，因為我哋都係第一次食，裏面用咗大量免治牛肉做餡料，口感好豐富。

另一推介係葡式椰汁雞，椰香香濃，而雞肉好滑好嫩，用嚟撈飯一流。

大食嘅我哋仲叫咗好多特色菜式架。其中蒜蓉黃油焗蝦仁都好yummy！蝦仁彈牙又索晒蒜蓉黃油汁，好正！

澳葡之家 La Famiglia
地址：氹仔花朵圍6-12號，木鐸街76號
營業時間：12:00 – 23:00
電話：+853 2857 6131

O-moon

去澳門買手信，除咗杏仁餅同豬肉乾，呢間賣精品嘅O-moon都好有特色，裝修以藍白色為主題，充滿葡萄牙風情。

叫O-moon唔通係因為門口有個勁吸晴嘅大月亮？其實係因為O-moon讀出嚟好似澳門呀。

呢度有好多唔同嘅特色精品，設計都係充滿澳門葡式味道。一於買個A字同M字做手信啦。

O-moon
地址：氹仔十月初五街124號
電話：+853 6206 7338

Digreen

大熱天時，行咗咁耐，梗要食杯雪糕啦。同我M佬一樣係芫莤控嘅就一定要去到以天然成份、低脂同健康為概念嘅Digreen試試呢個芫莤味雪糕喇！淡淡嘅芫茜味好清新，直情係初戀嘅感覺！但尋求重口味嘅朋友，建議你都係將成棵芫茜放落口啦！

怕食芫莤雪糕嘅A姐就叫咗杯紅肉火龍果沙冰，喺夏天飲一啖真係消暑一流！

Digreen
地址：氹仔告利雅施利華街58號地下
營業時間：11:00 – 22:00
電話：+853 6681 3228

喵您進來 Meow Meow Snacks

近期興鹹蛋系列，連雞蛋仔都遇上鹹蛋！味道估唔到會咁match。煙煙韌韌，鹹蛋味道香濃，粒粒都漲卜卜！

店內仲有豬扒包等澳門地道美食，不過今日真係太飽，一底足料嘅鹹蛋雞蛋仔，已經KO咗我哋。

喵您進來 Meow Meow Snacks
地址：氹仔告利亞施利華街51號
營業時間：11:00 – 22:00
電話：+853 6662 2422

Klook

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
報料或合作：aandmdiaryhk@gmail.com