【南機場夜市美食攻略】榮登台北人氣最強夜市！15間南機場夜市必食推介及前往方法
相對於饒河街夜市、寧夏夜市同士林夜市，南機場夜市嘅規模相對較細，加上遊客唔多，所以一向被視為本地人嘅夜市。不過，近年因為米芝蓮必比登推介，累積唔少名氣，加上南機場夜市嘅美食種類豐富，而且充滿地道特色，唔少攤檔都極具人氣，甚至被譽為全台北CP值最高嘅夜市，令南機場夜市成為遊客必到嘅台北夜市，即睇以下15間南機場夜市必食推介啦！
1. 南機場夜市 | 前往方法
1.1 南機場夜市交通：捷運
乘坐台北捷運至小南門站，於3號出口出站後，步行約15分鐘抵達
乘坐台北捷運至龍山寺站，於3號出口出站後，步行約16分鐘抵達
1.2 南機場夜市交通：巴士
12、204、205、212、212(直)、223、249、250、253、673、670、671、藍29至南機場公寓站下車
2. 南機場夜市 | 美食推介
2.1 南機場夜市美食推介：阿男麻油雞（位置地圖）
如果要數南機場夜市嘅Top 1，相信唔少人都會即時諗起阿男麻油雞！阿男麻油雞係其中一間被米芝蓮必比登推介嘅南機場夜市美食之一，金黃色嘅麻油湯底非常香濃，加上肉質嫩滑嘅招牌麻油雞肉，行過都已經聞到重噴噴，真係要排隊試試。
2.2 南機場夜市美食推介：山內雞肉（位置地圖）
位於南機場夜市大門口嘅山內雞肉，一直都深受當地人歡迎，直至成為米芝蓮必比登推介之後，成為另一人氣名店，同阿男麻油雞分庭抗禮。山內雞肉採用台灣仿山雞，每日新鮮烹調，飽滿多汁而且雞皮晶盈嘅雞肉，配上雞油拌飯同當歸清雞湯，確實滿足。
2.3 南機場夜市美食推介：臭老闆現蒸臭豆腐（位置地圖）
臭老闆現蒸臭豆腐係另一被米芝蓮必比登推介嘅南機場夜市美食之一，臭豆腐有別一般嘅脆炸，而係用湯汁上嘅濕豆腐。臭豆腐索晒秘製醬汁，加上唔同香料嘅調味，與其話佢嗅，其實又帶一點香味。
2.4 南機場夜市美食推介：曉迪筒仔米糕（位置地圖）
位於南機場夜市大門口另一邊嘅就係曉迪筒仔米糕，喺山內雞肉嘅正對面。曉迪筒仔米糕雖然以筒仔米糕為名，但曉迪嘅滷肉飯、豬腳、芋頭排骨湯，反而成為佢嘅人氣之選！滷肉飯雖然肥肉佔多但食嘅時候唔覺得太油膩，反而膠質感豐富，加上醬汁拌飯，又香又濃，真係食唔停口。至於芋頭排骨湯非常清香，芋頭入口即化。
2.5 南機場夜市美食推介：玉米家（位置地圖）
燒粟米燒到成為米芝蓮必比登推介，南機場夜市嘅玉米家確實唔簡單！粟米嚟自雲林縣，店家按粟米大小收費，非常公道。粟米有五種口味同五種辣度選擇，醬料嘅比例啱啱好，唔會太濃蓋過本身粟米嘅鮮甜味，更重要係粟米燒到微焦，層次口感非常豐富。
2.6 南機場夜市美食推介：饗咬好佳蚵嗲（位置地圖）
饗咬好佳蚵嗲有超過20款嘅炸物，全部即叫即炸，當中人氣極高嘅當然係炸蚵嗲啦！炸蚵嗲入面有勁多飽滿嘅蠔仔，口感勁豐富，加上韭菜同洋蔥，更能凸出蠔仔嘅鮮甜味，嚟到南機場夜市絕對值得花時間排隊呢！
2.7 南機場夜市美食推介：來來水餃（位置地圖）
南機場夜市有三大水餃店，其中人氣最高，人龍最長，絕對係來來水餃。來來水餃即包即煮，分為豬肉大白菜水餃同韭菜水餃兩款，一份10粒，肉餡非常豐富，一咬落去絕對會噴汁，超好味呢！
2.8 南機場夜市美食推介：八棟圓仔湯（位置地圖）
八棟圓仔湯係南機場夜市嘅老字號，開業超過40年，酒釀甜蛋湯圓係店家嘅招牌。酒釀甜蛋採用自家天然酵母慢慢發酵而成，味道酸甜清香，溫潤順口，至於湯圓為花生口味，皮薄餡多，係南機場夜市必食嘅甜品。
2.9 南機場夜市美食推介：泗元碳烤（位置地圖）
泗元碳烤嘅店面非常企理，就全部即叫即烤。但更重要係全店劃一收費，每串都係新台幣$15，非常抵食，而且送啤酒就更一流喇！
2.10 南機場夜市美食推介：麻樂豚骨麻辣燙（位置地圖）
麻樂嘅麻辣燙湯底，除咗麻同辣，湯底用上豚骨湯底熬煮，所以味道更豐富，充滿層次。如果鍾意食辣，建議由大辣起步，因為小辣同中辣確實唔夠過癮。
2.11 南機場夜市美食推介：店長鴨血（位置地圖）
鴨血同麻辣真係絕配，而鴨血真係要嚟到台灣先好味架！店長鴨血嘅鴨血非常滑嫩，而且索晒麻辣嘅辛辣香料之餘，湯底仲有一份鮮甜味。
2.12 南機場夜市美食推介：珍香滷味（位置地圖）
我哋真係好鍾意食台灣嘅滷味，而南機場夜市嘅代表就有珍香滷味。珍香滷味亦有別於一般嘅乾滷味同加熱滷味，所有食材都係預先滷製再加熱，所以滷味唔會得個鹹字，帶有淡淡嘅滷水香料味。
2.13 南機場夜市美食推介：北投紅茶（位置地圖）
嚟到台灣旅行，一日一杯珍奶真係走唔甩！南機場夜市內有唔少茶飲店，惟獨北投紅茶大排長龍。正如店名一樣，呢間茶飲店重視茶底，紅茶香而不澀，加上奶香同Q彈珍珠，如果人龍唔太長嘅話，不妨排隊一試。
2.14 南機場夜市美食推介：珍好味港仔城（位置地圖）
對於香港人嚟講，喺台北夜市食港式美食，真係一啲都唔夜繽紛，但珍好味港仔城可以話係南機場夜市其中一間排隊名店。唔少台灣人一向都鍾情港式美食，其中菠蘿包、雞蛋仔，真係一出爐就秒速售罄。如果撞啱新鮮出爐，不如買一個試試。
2.15 南機場夜市美食推介：福賓牛排鐵板燒（位置地圖）
每個夜市都總會有鐵板燒，至於南機場夜市嘅鐵板燒代表就係福賓牛排鐵板燒。鐵板嘅滋滋聲上，放上大大份嘅牛扒、雞扒或豬扒，配上意粉、沙律、酥皮湯同紅茶，以抵食又飽肚為賣點。
南機場夜市 Nanjichang
地址：台灣台北市中華路二段307巷
營業時間：星期一至日 17:00–00:00
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
