【郵輪攻略：娛樂設施篇】挪威非凡號有咩玩？5個郵輪上不可錯過嘅娛樂項目推介

以前唔少香港人坐郵輪，都會叫「上賭船」，因為郵輪上嘅設施就好似只有賭場。不過，近年嘅郵輪已經變成一艘海上度假村，娛樂消閒設施非常豐富！但當水上樂園同百老匯歌劇都滿足唔到郵輪嘅乘客，挪威非凡號（Norwegian Viva）則設有海上最大型嘅賽車賽道，10層樓高嘅滑梯等嶄新嘅設施，讓郵輪假期變得更精彩。

挪威非凡號（Norwegian Viva） – 娛樂設施推介：Viva Speedway

有無諗過喺郵輪上都可以玩賽車呢？賽車可以話係挪威郵輪公司（Norwegian Cruise Line）近年郵輪上必備嘅標誌性娛樂設施，而挪威非凡號（Norwegian Viva）更設有三層賽道，堪稱海上最大型嘅賽道。Viva Speedway嘅最高時速大約只有35公里，但因為賽道上有唔少上落斜，加上多個轉彎位，所以都非常刺激！想喺郵輪上玩賽車只需要附合高度要求，戴上提供嘅安全頭盔，就算無車牌都玩得架！

挪威非凡號（Norwegian Viva） – 娛樂設施推介：The Drop & The Rush

知唔知有咩方法，可以用5秒就由18樓去到8樓呢？答案係瀡滑梯呀！挪威非凡號（Norwegian Viva）設有3條滑梯，其中The Drop更加係剌激嘅選擇。大家要先進入The Drop嘅滑梯管道，工作人員隨即會倒數並按掣，然後你就會隨即滑下，其實過程唔算太快太刺激，反而等待工作人員按掣嘅時間，真係好緊張呀！

挪威非凡號（Norwegian Viva） – 娛樂設施推介：Pool, Vibe Beach Club, The Wave & Kids’ Aqua Park

喺郵輪上游吓水、曬吓太陽，絕對係坐郵輪嘅指定活動！所以挪威非凡號（Norwegian Viva）嘅水上設施非常豐富，除咗頂層嘅泳池同2個按摩池之外，喺8樓甲板亦設有2個無邊際泳池。The Haven嘅住客更可使用尊享嘅無邊際泳池；至於其他成人住客亦可以upgrade使用Vibe Beach Club，享受郵輪上嘅寧靜時光。另外，挪威非凡號（Norwegian Viva）亦設有Kids’ Aqua Park，適合小朋友及親子旅客；但如果想尋求刺激，就一定唔可以錯過The Wave，玩法有啲似水上樂園嘅小喇叭，但喺大海上玩，視覺上增添衝落海嘅感覺，刺激感大大提升。

挪威非凡號（Norwegian Viva） – 娛樂設施推介：Viva Theater & Club

除咗以上動態嘅活動，挪威非凡號（Norwegian Viva）當然都有唔少靜態嘅設施。其中Viva Theater每晚都會上映唔同嘅娛樂節目，包括棟篤笑、音樂會等，而最精彩嘅當然係挪威非凡號（Norwegian Viva）皇牌嘅百老匯舞台劇：《Beetlejuice: The Musical》。呢個百老匯舞台劇改編自美國經典電影《Beetlejuice》（陰間大法師），故事主要講述一對因事故去世並變成鬼魂嘅年輕夫婦想住喺其在生時嘅住所，於是請咗一位嚟自陰間嘅驅魔師試圖將新住戶嚇走嘅搞笑故事。

挪威非凡號（Norwegian Viva） – 娛樂設施推介：Mandara Spa

上郵輪玩最緊要就係歎，至於講到歎，當然唔少得做Spa啦！挪威郵輪公司（Norwegian Cruise Line）採用源自於印尼峇里島嘅Mandara Spa，後更被世界水療獎評選為「世界最佳遊輪水療中心」。而最新下水嘅挪威非凡號（Norwegian Viva）內嘅Mandara Spa服務亦非常全面，設有水療按摩中心、多間桑拿浴室、蒸汽浴室等設施，大家更可以享受唔同種類嘅按摩，讓身體裏裏外外都達至放鬆嘅境界。

挪威非凡號（Norwegian Viva） – 其他娛樂設施推介

除咗以上嘅設施之外，挪威郵輪公司（Norwegian Cruise Line）更設有小朋友俱樂部：Splash Academy、大人小朋友都啱玩嘅哥爾夫球：Tee Time、遊戲機中心：Galaxy Pavilion、健身室：Pulse Fitness Centre、玻璃底甲板：Ocean Walk、購物大道：The Gateway等等嘅設施。另外，郵輪上每日都會更新活動日誌，大家可以參加唔同嘅活動，令郵輪假期變得更精彩。

挪威非凡號（Norwegian Viva）郵輪攻略：餐廳推介

更多詳情：【郵輪攻略：美食篇】挪威非凡號免費餐廳多達16間？邊5間餐廳係必食心水推介

挪威非凡號（Norwegian Viva）郵輪攻略：郵輪資料

級別：領途級（Prima Class）
排水量：143,535噸
甲板樓層：20層
首航年份：2023年8月
客房數量：1,586間
最高載客量：3950人
最高船員數目：1506人
（資料來源：挪威郵輪公司）
更多詳情：【郵輪攻略】挪威非凡號首航出發，即睇必玩、必食、航線等郵輪懶人包

世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–

挪威郵輪公司 – 挪威非凡號 Norwegian Cruise Line – Norwegian Viva
立即預訂：www.ncl.com

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com