【郵輪攻略：美食篇】挪威非凡號免費餐廳多達16間？邊5間餐廳係必食心水推介
平時大家一日最多食幾多餐呢？如果上郵輪玩真係一日食足12餐呀！因為郵輪嘅房費已經包括大部份嘅餐飲美食，今次我哋去咗挪威非凡號（Norwegian Viva）玩，呢架郵輪嘅免費餐廳更多達16間，而收費餐廳及酒吧亦超過20間，真係要帶多幾個胃上郵輪慢慢嘆先得呀！如果想重點出擊，不如睇睇邊5間餐廳係我哋嘅必食心水推介啦！
挪威非凡號（Norwegian Viva） – 餐廳安排
挪威郵輪公司（Norwegian Cruise Line，簡稱：NCL）旗下最新啟航嘅領途級郵輪：挪威非凡號（Norwegian Viva），以多元化嘅餐廳選擇作為一大賣點！而且用餐嘅安排有別於一般郵輪嘅限制，旅客可以完全按照自己嘅習慣，安排用餐時間，而且亦無任何服裝規定，讓行程安排彈性亦更大眾化。如果喺挪威非凡號（Norwegian Viva）享用免費餐廳，事前更不用預約，只要喺餐廳嘅營業時間內到達即可獲安排入座，並無任何限制。
挪威非凡號（Norwegian Viva） – Speciality Dining Package / Beverage Package
挪威非凡號（Norwegian Viva）設有超過20間收費餐廳及酒吧，每一間都極具特色！例如日式鐵板燒、扒房、意大利菜等等，就算習慣每朝一杯Starbucks，都可以喺挪威非凡號（Norwegian Viva）搵到。如果想試吓郵輪上嘅收費餐廳同酒吧，建議大家可以預先購買Speciality Dining Package同Beverage Package，比直接喺餐廳消費更優惠架！另外，大部份收費餐廳都提供預約服務，建議大家購買套票後隨即透過郵輪上嘅apps或到指定預約櫃檯預先登記，因為部份餐廳極具人氣，絕對係一座難求呀。
挪威非凡號（Norwegian Viva） – 免費餐廳推介：Indulge Food Hall
挪威非凡號（Norwegian Viva）嘅免費餐廳多達16間，每日要諗食乜都幾頭痕！而我哋最鍾意嘅免費餐廳就係以food court為concept嘅Indulge Food Hall！Indulge Food Hall內設有11間唔同選擇嘅國際菜式，除咗西班牙菜、意大利菜、美式漢堡包等歐美選擇之外，估唔到喺呢架主打歐美航線嘅郵輪都搵到唔少亞洲菜式！例如新加坡嘅星洲炒米、泰國嘅Pad Thai、中國同印尼嘅湯麵、印度咖哩等等，絕對能夠滿足擁有亞洲胃嘅我哋啦！
挪威非凡號（Norwegian Viva） – 免費餐廳推介：Hudson’s
如果想喺一望無際嘅大海用餐，享受浪漫嘅用餐體驗，就一定要去Hudson’s喇！Hudson’s設有270度嘅無敵海景景觀，餐廳以à la carte形式提供早、午、晚三餐，以西餐為主嘅menu每日更新，我哋更喺其中一日航程時，驚喜見到中菜選擇呢！雖然餐廳並無任何服裝要求，但挪威非凡號（Norwegian Viva）嘅Hudson’s絕對係打卡餐廳，所以建議大家著靚啲，影多啲靚相喇。
挪威非凡號（Norwegian Viva） – 免費餐廳推介：Surfide Cafe & Grill
大部份大型嘅郵輪都設有自助餐廳，挪威非凡號（Norwegian Viva）當然亦唔例外。作為自助餐廳嘅Surfide Cafe & Grill設於挪威非凡號（Norwegian Viva）嘅17樓，係位置最高嘅免費餐廳選擇，坐喺窗口位置可以觀賞更遼闊嘅景色。但其實景觀並非佢嘅最大賣點，反而係每日都會有唔同主題，我哋其中一日航程更以海鮮為主題，非常驚喜！
挪威非凡號（Norwegian Viva） – 收費餐廳推介：Hasuki
要數挪威非凡號（Norwegian Viva）最強人氣嘅收費餐廳，就一定係Hasuki！話說我哋一上郵輪，放低行李就立即預約Hasuki，點知每日都只係淨番最夜嘅一個用餐時段，所以如果想食日式鐵板燒嘅話，真係連行李都未放低就要book咗先呀！至於Hasuki提供牛扒、雞肉、海鮮等鐵板燒食材，最正當然係坐喺鐵板前面，邊食邊同廚師互動，再細心欣賞佢嘅功架啦！
挪威非凡號（Norwegian Viva） – 收費餐廳推介：Cagney’s Steakhouse
如果買咗挪威非凡號（Norwegian Viva）嘅Speciality Dining Package，就一定要去Cagney’s Steakhouse据扒，因為Cagney’s Steakhouse嘅消費相對其他餐廳高，所以用嚟抵消Speciality Dining Package，就夠晒抵啦！Cagney’s Steakhouse嘅牛扒採用美國安格斯牛肉，肉味濃郁，更可以自行選擇切牛扒嘅餐刀，真係非常講究。
挪威非凡號（Norwegian Viva）郵輪攻略：設施推介
更多詳情：【郵輪攻略：娛樂設施篇】挪威非凡號有咩玩？5個郵輪上不可錯過嘅娛樂項目推介
挪威非凡號（Norwegian Viva）郵輪攻略：郵輪資料
級別：領途級（Prima Class）
排水量：143,535噸
甲板樓層：20層
首航年份：2023年8月
客房數量：1,586間
最高載客量：3950人
最高船員數目：1506人
（資料來源：挪威郵輪公司）
更多詳情：【郵輪攻略】挪威非凡號首航出發，即睇必玩、必食、航線等郵輪懶人包
世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–
挪威郵輪公司 – 挪威非凡號 Norwegian Cruise Line – Norwegian Viva
立即預訂：www.ncl.com
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
