逝去的新聞自由 被淡化的俄烏戰爭

香港曾經係全世界其中一個新聞最自由嘅地方，但近年政府多翻打壓，警察公然傷害新聞從業員，縱使政府多次表示香港嘅新聞同採訪自由仍然受到保障，但事實係多間本地媒體結業，甚至國際新聞集團結束營運香港嘅總部。除咗採訪本地新聞受到影響，就連國際矚目嘅俄烏戰爭，你又有無發覺新聞篇幅都越嚟越少呢？

香港係一個國際城市，香港人一向都好有國際視野，點解會被淡化報導呢？唔通一個國際城市已正式「升級」成為一個大灣區嘅鄉村市鎮？

相信無論任何政見嘅正常人都唔會想見到打仗，但如果談判解決唔到問題，當打仗先係唯一嘅解決方法，咁都要講出師原因。好似今次俄烏戰爭，我就完全唔明白，一個主權獨立嘅聯合國國家希望加入政治或軍事組織，結果竟然係會換嚟一場生靈塗碳嘅戰爭。更離譜嘅係，中國嘅小粉紅更加覺得係烏克蘭人自己攞嚟，表示支持呢一場戰爭，甚至以離婚夫妻關係嚟形容俄羅斯同烏克蘭嘅關係。請問佢哋唔係成日標榜不干涉主權國家嘅內政咩？咁點解會支持俄羅斯攻打烏克蘭呢？

嚟到英國，我哋喺一次嘅烏克蘭集會入面，聽到啲難民分享逃難同戰爭嘅過程，都聽唔到幾句，我嘅眼淚就流咗出嚟。相信如果香港未有國安法，稍有良知，愛好和平嘅香港市民都會遊行到俄羅斯領事館請願。

香港嘅新聞自由雖然不斷退步，但至少仍未有一個傳媒夠膽公然發放假新聞。所以中共粉飾俄羅斯嘅假新聞、假觀點唔可以喺香港主流媒體刊登，只可以將俄烏戰爭淡化，減少影響同樣追求自由民主嘅烏克蘭人同香港人嘅聯繫。另外，當西方國家繼續經濟制裁俄羅斯同中國嘅時候，香港就會係佢哋最好用嘅一隻棋喇！

俄烏戰爭 Russo-Ukrainian War

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com