【台北景點】輕鬆易行兼影101，必到的三個象山打卡check point

相信大家都知道，台北嘅地標，就係台北101！如果試過同101打卡，太近會影唔晒，太遠又會太多途人，咁邊度先係101嘅最佳拍攝點呢？答案就係象山喇！象山鄰近台北101，高184米，而象山親山步道全程路段輕鬆易行，中途有多個打卡check point，而作為遊客，我哋就推介以下3個必到的象山打卡點。

象山親山步道旅遊攻略 | 1. 提提你

1. 象山親山步道屬於初級路線，以上落梯級為主，大家記住要量力而為
2. 大家記住保持環境清潔，自己垃圾自己帶走，絕對唔可以破壞大自然環境
3. 如果諗住上山睇日落或夜景，沿路無街燈，所以大家記住自備電筒出發
4. 大部份路段接收訊號都非常良好，所以唔怕蕩失路，但都要喺出發前，搜尋一吓自己想去嘅路線，或參考以下嘅象山親山步道郊遊路線

象山親山步道旅遊攻略 | 2. 前往方法

象山親山步道共有5個登山口，而作為遊客，我哋就建議喺象山捷運站落車後，由2號出口出站，再行經象山公園，前往代天殿靈雲宮嘅登山口。喺代天殿靈雲宮嘅登山口出發，沿路都喺梯級為主，我哋以超然亭作終點站，沿路往返。

象山親山步道旅遊攻略 | 3. 象山101觀景台

由象山親山步道嘅代天殿靈雲宮嘅登山口出發，大概15分鐘左右就會去到象山101觀景台。象山101觀景台前面無大樹遮擋，所以嚟到呢個觀景平台已經可以盡情同台北101打卡喇！另外，觀景平台上有長凳，更可以稍作休息，再往下一個check point出發。但如果你嘅目標，唔係行山郊遊，只係想睇吓台北101或信義區嘅高樓大廈夜景，咁你嚟到象山101觀景台就可以沿路往返，因為之後嘅check-point都係以觀景為主。

象山親山步道旅遊攻略 | 4. 六巨石攝影平台

講到象山親山步道最出名嘅觀景點，第一時間都會諗起六巨石攝影平台。唔少人鍾意爬上大石影相打卡，但今日天氣麻麻，多雲微雨，所以我哋只係喺附近嘅攝影平台影相打卡。離開六巨石攝影平台前往超然亭途中，更會經過標高柱，係另一打卡熱點。

象山親山步道旅遊攻略 | 5. 超然亭

正所謂「欲窮千里目，更上一層樓」，我哋嚟到象山親山步道最靚最廣闊嘅觀景點：超然亭。超然亭比之前嘅觀景平台更遼闊，更無遮擋。亭下面有枱有凳，亦方便大家set機影相影台北夜景，係拍台北stock photo嘅熱點。更更更重要係，對比之前觀景點，超然亭人流更少，影相打卡都唔會比人阻住啦！而我哋亦非常幸運，沿路上山時，天氣一直都麻麻，雲層較低，睇唔晒整座台北101，但上到嚟超然亭，天色入黑，雲層消散，除咗睇到台北101全景，更可以睇到壯觀嘅信義區高樓大廈夜景呢！

世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–

象山親山步道 Xiangshan Hiking Trail

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com