[香港Staycation] 月租劏房價 香港逸酒店
想同另一半過二人世界，除咗可以玩近期大熱嘅酒店Staycation之外，月租酒店都係一個唔錯嘅選擇，或者可以趁呢段同居時間，睇清楚M佬究竟嫁唔嫁得過啦，哈哈！其實依家唔少酒店嘅月租優惠套票，可能比起租劏房仲要平，而且仲有更大私人空間同酒店式嘅服務。如果屋企要裝修、追求私人空間或者好似我咁，想深入了解你嘅另一半，月租酒店確係一個唔錯嘅選擇，租期又相對有彈性，租一個月都得，唔洗受生約死約所規範。今次我哋就去到紅磡嘅逸酒店Hotel Sav，先玩一晚Staycation，check-out之後參觀埋佢哋嘅月租示範單位添，不如下個月一齊搬去逸酒店做鄰居啦！
預訂網址：www.klook.com
酒店大堂
酒店位於紅磡，由黃埔港鐵站步行10分鐘就到喇，交通位置都算方便！逸酒店樓高25層，提供超過380間客房。酒店認為顏色係心靈嘅語言，所以酒店嘅設計非常色彩繽紛，又不失型格。原先嘅前台位於1樓，但因為疫情關係，酒店將前台搬到地下，以防止有病症嘅人進入酒店範圍，所以酒店前台非常簡單，但手續非常迅速，我哋好快就check-in成功，去到房間喇！
客房區域
我哋今次入住高級大床房，酒店喺2015年開業，房間尚算新淨。客房面積唔算大，床係一張標準雙人床。雖然床褥就比較硬，但驚喜在於提供枕頭menu，可以揀選合適你嘅枕頭。
至於窗就採用落地玻璃設計，景觀為紅磡一帶景色，我哋入住16樓，尚算開揚，令房間空間感大增。
房間另設有開放式衣櫃、電熱水壺、2支支裝水、雪櫃同免費茶包等等。為對應番顏色係心靈嘅語言，房間亦可自行調教色彩，今日我就揀咗代表放鬆嘅綠色，坐喺書枱嘅位置寫吓稿喇。
另一驚喜係電視頻道嘅選擇好多，留喺房間都有唔同嘅電影台選擇，絕對唔怕悶親你。
浴室區域
浴室嘅面積又唔會太迫，就算淋浴位置企2個人都仲有大把位轉身。至於沐浴用品使用自家品牌，我覺得都唔錯！至於個人用品方面，包括有：牙膏、牙刷等等。
健身室
酒店設有健身中心，器材方面有跑步機、單車機、踏步機同啞鈴等等。喺勁多嘢食嘅紅磡，食飽飽再做吓運動都唔錯。
共享空間：The Space@sáv
酒店設有室內同戶外共享空間，無論你係月租定日租，都可以嚟到呢度睇吓書，玩吓桌球或足球機，亦可以免費租借board game，包括大富翁、UNO同層層疊等等，同朋友一齊玩吓。
而我哋最鍾意就係個戶外空間，睇吓書、聽吓歌，成個人放空一吓，相當唔錯。
閱讀室
喺酒店亦設有閱讀室，環境都唔錯㗎，可以喺呢個寧靜嘅環境睇吓書，都幾心曠神怡。
餐飲服務
酒店另設有一間中餐廳同一間西餐廳，包括：Moreish & Malt同紫荊閣。我哋之前分別都試過，可以參考返。而今次入住就試咗佢哋近期大熱嘅$40起自助早餐（詳情按此）。
西餐情報：由一千零一夜開始 紅磡Moreish & Malt
中餐情報：酒店叫餸食飯 紅磡Hotel Sav紫荊閣
月租住宿優惠套餐：
月租低至HK$7,300，費用包括：
• 管理費、水費及電費
• 迎新禮品
• 無線上網
• 房間打掃同更換床單(自選服務)
• 使用24小時開放嘅共享廚房、用餐區、健身室及閱讀室
• 洗衣及磅洗服務優惠
• 24小時保安
• 禮賓服務
• 參與多元化住客活動
• 列印及影印服務
• 物品儲存服務優惠
• 儲物櫃租用
• 單車停泊服務
• 餐飲優惠
• 其他商戶折扣優惠
月租計劃提供唔同房型，除咗標準嘅雙床同大床房，亦有面積較大嘅高級客房同豪華房，房間都配備雙床或大床，書枱、開放式衣櫃、電熱水壺同雪櫃等等，主要分別都係客房面積、景觀，以及窗口嘅大小。
標準房
豪華房
另外，因應附近都有唔少大學，逸酒店亦提供學生房間，配有碌架床同大大張書枱，環境比宿舍好好多，溫書一定事半功倍。房間亦設有locker，就算同陌生嘅roommate share room都唔怕啦！
共享廚房及用餐區
月租嘅住客仲可以去到共享廚房大展身手，廚房用具一應俱全，煎吓扒、炆煮炸焗都得！煮完仲可以去到室外或户內用餐區，同朋友食吓嘢，傾吓計！
月租嘅住客亦可使用健身室、共享空間同閱讀室，真正以劏房價享受嘅酒店服務呀！
世界各地／香港景點門票邊度買至平？
–> 詳情請睇：https://wp.me/p8vzXP-6G <–
逸酒店 Hotel Sav
地址：九龍紅磡蕪湖街83號
預訂網址：www.klook.com
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
