[香港Staycation] 美肌體驗連活化懷舊住宿 太子Hotel1936
相信有唔少人同A姐一樣好貪靚，其實想靚一啲都唔難，最緊要夠瞓！但如果想再靚啲，不如做埋facial，咁自然會靚上加靚啦！嚟到聖誕節，我就帶A姐去到太子嘅Hotel1936玩Staycation，同佢enjoy美肌體驗嘅兩日一夜Stcyation，等佢夠瞓之餘仲可以俾皮膚做吓保養，咁住完之後就一定容光煥發啦！
預訂網址：www.klook.com
酒店大堂
被評為三級歷史建築物嘅唐樓建於1936年，所以酒店命名為「Hotel 1936 」。其實酒店主要分為2部份：唐樓樓高3層，外牆以至內部都被完整保留同復修活化；而客房區其實係全新興建，位於唐樓後座位置，樓高20層，以中國傳統嘅博古架線條作為大廈外牆設計。
以懷舊為主題嘅Hotel 1936係一間精品酒店，內部裝修盡量保留歷史嘅元素，好似木門、露台、格仔階磚等等，充滿懷舊氣息又不失時尚簡約。搭電梯去到位於3樓嘅酒店大堂，就好似坐時光機返到30年代嘅香港，呢度勁多打卡位，夠大家喺度玩半日！另外，酒店位於彌敦道，巴士選擇非常多，交通非常方便，至於步行3分鐘就到太子站或10分鐘就到旺角東站喇！
修身堂面部護理
今次嘅Staycation重點，當然就係包埋修身堂嘅美肌體驗啦！呢個美肌體驗仲可以喺入住酒店後嘅60日內預約，咁就唔怕嘥咗入住酒店嘅打卡時間啦！預約過程一啲都唔繁復，地址可以選擇尖沙咀、銅鑼灣、中環分店，只要提前48小時或之前預約就得。今次嘅面部護理仲有保濕或深層清潔兩種俾你揀，其中冰肌注氧護理就採用深層鎖水保濕因子，等皮膚可以深層吸收水分，提升肌膚彈性，啱晒依家呢啲乾燥季節；至於另一款就係Aqua果酸淨化護理，過程中選用唔同濃度嘅果酸，由於渗透力強，可以去除肌膚表面嘅老化角質層，令细胞老化周期缩短，仲可以刺激細胞生長，令皮膚年輕番！
其實兩款我都想做晒呀，但最後我就揀咗冰肌注氧護理。喺整個過程中，店員都會細心了解你平時嘅護膚情況同皮膚屬性，之後，我就唔記得喇…哈哈！因為真係好舒服，舒服到我瞓著咗都唔知！但起身嘅時候，真係覺得皮膚吸收晒水份，本身繃緊同乾嘅感覺無晒！整個過程店員亦無hard sell，舒舒服服就享受完大約一小時嘅療程，成個人都容光換發晒！
住客優惠
持有電子房卡更可享有住客尊享嘅優惠，例如洗衫、買花、餐飲等，非常貼心。
客房區域
酒店樓高20層，設有50間客房，房型分為經典房同尊貴經典房，我哋今次入住嘅係尊貴經典房。
平時住酒店一係海景，一係就市景，但Hotel 1936嘅景觀就係代表香港精神嘅獅子山，絕對係一個先天嘅賣點。配合埋獅子山下嘅九龍市景，單單係呢個view已經係一個打卡位啦！房間面積唔算大，但都係三邊落床，床褥屬於適中偏硬，加上新酒店新床褥，所以瞓得舒服！
房間內提供免費茶包、雪櫃、保險箱、風筒、USB充電插頭、免費無線上網，麻雀雖小，五臟俱全。
當然，客房嘅裝修同樣以懷舊復古為主題，房間以綠色同啡木色為主調，加上幾何圖案、球形裝飾燈同圖邊直身鏡等等，好有30年代嘅特色！
浴室區域
浴室乾濕分離，雖然無得浸浴，但淋浴位置都算寬躺，水壓一流。
酒店亦有提供牙刷、浴帽、淋浴露同洗頭水等嘅個人用品。
舊建築展覽廳
酒店雖然無游泳池同健身室，但位於酒店2樓嘅展覽廳都有勁多打卡位，非住客亦可以免費參觀㗎！
展覽廳其實係一個30年代嘅住所，單位保留原有嘅裝潢同建築元素，設計以30年代於歐洲盛行嘅Art Deco裝飾藝術建築風格，以幾何圖形同線條為主；而從大廳嘅火爐、木地板、地磚、木門同窗簾框等裝潢，亦睇得出係當時嘅富有家庭規格。房內嘅物品同裝修都充滿設計特色，完整地保留落嚟。
另外，展廳亦設有多個時期嘅相片，展出Hotel 1936翻新前嘅樣貌同歷史故事。
Hotel 1936
地址：九龍太子道西179號
網址：www.klook.com
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
