紅磡餐廳美食推介

美食廣場都好chill，堅？紅磡栢檔極品海南雞飯

假期想chill吓，原來去美食廣場都得，堅？位於紅磡嘉里酒店嘅美食廣場臨海而建，提供超過10間國際美食餐廳選擇。推介嘅栢檔極品海南雞飯，主打海南雞飯、肉骨茶等南洋美食，加埋維港海景，真係勁有獅城feel，享受一個簡單卻又非常舒服嘅用餐選擇。

一頓完美嘅餐飲體驗，除咗食物本身，店員嘅服務，其實仲有環境氣氛呢！位於黃埔嘅O’Thai Restaurant，就將整個維港景送俾你，更特設户外位置，夠晒chill。至於餐廳以泰國菜聯乘意大利菜，選擇多而且出品高質之餘，營業時間更至凌晨1點，符合你嘅夜貓生活。

香港有唔少福建人，但福建餐廳嘅選擇相對比較少，甚至想無知一問，其實福建菜係食咩呢？為咗挑戰自己嘅無知，嚟到紅磡嘅沙縣特色小吃，由當地嘅地道小食認識福建菜，當中嘅扁肉、拌麵、蒸餃、燉罐，堪稱為沙縣嘅名物。

同朋友們笑笑說說想想，不經意就肚餓喇！成班餃子控，真係唔洗諗，今餐一定係去食餃子啦！喺紅磡嘅勁餃笑，屬於家庭式經營嘅水餃店，水餃口味選擇多，充滿驚喜，值得推介。

日本菜係香港人最鍾意嘅菜式，而Omakase（廚師發辦）更成為當中嘅至尊選擇。Omakase當然係廚師嚴選嘅最佳食材，但有時廚師都未必能夠完全掌握到你嘅心意，所以自選壽司更適合你，可以自己揀自己鍾意食嘅魚生啦！嚟到黃埔吉祥日本料理，自選壽司嘅選擇非常多，食材高質，同樣充滿幸福感。

去紅磡搵食真係一啲都唔容易，因為紅磡嘅餐廳選擇多，花多眼亂，根本唔知揀咩好！如果好似我哋咁，跨區嚟搵食，就更擔心錯過好味嘅餐廳。嚟到滿堂樂滬京風味，門外已經有一條長長人龍，應該係唔錯選擇。

曾經何時，香港盛行集團連鎖式西餐廳，當時中學生嘅我哋，去呢啲餐廳食午餐，絕對係當時嘅一個高質指標。但經過時代洗禮，市場口味改變，當年嘅連鎖式西餐廳所剩無幾。而今日嚟到紅磡嘅紅蔥頭，重拾當年回憶之餘，估唔到味道都有驚喜。

紅磡有唔少臥虎藏龍嘅餐廳，所以不時都會為味覺帶嚟驚喜！今次嘅驚喜嚟自一間小店：泰好食，餐廳顧名思義主打泰國菜，並由泰國人主理，味道夠晒正宗，而且相對九龍城嘅泰國菜，價錢更親民，性價比高。不過，餐廳位置唔多，遇上繁忙時間，可能要等等喇！

甜、酸、苦、辣、鹹，五種味道，邊一種最吸引你呢？當唔開心嘅時候，就最想食甜嘢；當無乜胃口嘅時候，就最想食酸酸辣辣，夠晒開胃醒神呀！嚟到紅磡嘅銘興酸菜魚，酸辣嘅刺激感，令胃口大開，越食越滋味！

如果有慶祝活動，好似生日、拍拖紀念日、週年紀念、考第一，香港人都特別鍾意食buffet慶祝！所以我哋一家大細就去到嘉里酒店嘅大灣咖啡廳，今期buffet以東南亞美食為主題，馬來西亞、泰國、新加坡、越南同印尼嘅菜式都有，真係要由lunch開始留肚先得呀！