赤柱半日遊 週末好去處

赤柱係一個充滿異國風情嘅海邊小鎮，亦係外國遊客必到嘅香港旅遊景點，依家仍然吸引唔少遊客嚟到赤柱，令呢度嘅遊客比本地人仲要多。今個weekend同A姐嚟到，身邊都係外國人，感覺更似係我哋去咗外國添！下個假期嚟赤柱悠閒漫步都唔錯㗎，而且呢度仲有唔少打卡位，拍拖都夠晒浪漫。

赤柱市集
市集主要售賣手工藝品，好似皮革、畫作同工藝品等，當然遊客先會買嘅紀念品呢度都有啦！

民益大排檔
位於市集入邊，都有兩間大排檔，其中最出名嘅泗益今日冇開，唯有再畀多次機會民益啦！其實以前嘅民益都唔錯㗎，但可惜一次比一次失望，今次我同M佬一人一碗麵。落單前已經特登叫佢加辣加咖喱汁，但都係淡而無味，而且配料亦唔係花巧嘢，估唔到連紅腸都可以係無味嘅。所以大家嚟到赤柱，記住記住記住唔好做傻事啦！

美利樓
喺1982年，政府為咗持續發展中環，將原址位於中環，建於1844年嘅美利樓拆毁，然後將3000幾件花崗岩搬去赤柱完整重建，好有歷史價值。原本嘅美利樓係軍事用途，依家重建活化成為食肆商店。由於具有維多利亞時期色彩，所以係赤柱最靚打卡位置！

卜公碼頭
建於1920年嘅中環卜公碼頭因後來維港填海工程而清拆，後來喺赤柱重置。喺呢個碼頭睇日落夕陽，影相好靚㗎！活化後嘅卜公碼頭亦有提供渡輪服務往返蒲台島。

天后廟
第一代天后廟建於1767年，經過多次翻新，廟內仍存有於建廟時鑄造嘅銅鐘。赤柱天后廟以四合院設計，中間設有天井。

赤柱 Stanley

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com