久違的日本旅行 尖沙咀牛八和牛燒肉屋Express

日本係唔少香港人嘅鄉下，久違嘅日本旅行，最掛住嘅當然係日本美食啦！今日M佬就帶我嚟到位於尖沙咀The One嘅牛八和牛燒肉屋Express，嚟一次日本偽旅行！餐廳佈置成一個機場咁，細心到入座仲會一人有一張登機證添，之後就由機長Captain Gyuhachi喺呢2個小時帶我哋向日本出發啦！

牛八和牛燒肉屋Express
餐廳本身就有勁多打卡位，一於喺食飽肚腩凸出嚟之前打咗卡先啦！首先喺入嚟餐廳嘅時候，每人就會有一張代表唔同放題級別嘅登機證，真係好有feel呀！另外，喺天花上仲有航班資料，加上不定時嘅日文同英文登機廣播，真係夠晒細緻。當大家用QR code落order之後，你嘅飛機餐就會由牛八航空經跑道嘅自動送餐系統送上喇！

飛機餐
呢度嘅飛機餐分為午市套餐同4款放題選擇，今日為咗重拾日本嘅味覺，特別揀咗全84品嘅和牛放題！我哋食完之後，真心高度推薦呀！

自取區
喺等緊燒肉嘅時候，可以喺自取區攞嘢食先！驚喜嘅係韓式泡菜，真係好啱我口味，我堅食咗3碟呀！另外，呢度仲有唔少蔬菜選擇，例如：粟米、冬菇、秋葵、南瓜、茄子、翠玉瓜同生菜等等，記住蔬菜絕對唔少得，因為可以降低肉嘅油膩感，食得更多呀！除咗要燒嘅蔬菜，仲有沙律、前菜、熟食、飲品同甜品，尚算豐富。

日本黑毛和牛牛肋肉
呢個日本黑毛和牛牛肋肉係和牛放題獨有嘅選擇，真係食多幾碟都夠回本啦！因為帶俾你久違嘅入口即熔口感呀！上枱嘅時候已經見到雪花分怖非常平均，燒完之後，仲加添咗一份焦香感，和牛嘅油香喺整個口腔徘徊，非常滿足。

澳洲和牛牛肋肉
呢個澳洲和牛牛肋肉係和牛放題獨有嘅選擇，呢款和牛嘅油脂相對日本黑毛和牛牛助肉少，但牛肉味超香濃，各有所好！

澳洲和牛牛舌
牛舌厚切，經過大火燒烤嘅牛舌，肉汁被鎖住，肉質爽口，仲有好濃厚嘅牛肉香味。

海鮮
除咗和牛，海鮮就有魷魚、大蝦、清酒青口、橄欖油蒜香蝦等。特別推介大蝦，蝦身大大隻，爽口彈牙，而蝦頭仲有好多膏添！

其他食物
除咗海鮮同和牛，全部84品嘅嘢食仲包括雞肉、豬肉、牛肉、炸物同主食等，真係兩個胃都無可能全部食得晒呀！

雪糕
唔好以為張登機證只係用嚟影相打卡呀，記住用嚟換雪糕呀！每款放題套餐嘅雪糕都有所不同，而我哋呢個和牛套餐嘅雪糕就係京都抹茶庵嘅抹茶同焙茶口味，雪糕好滑，更重要係啲茶味好濃郁，令油膩感瞬間消失。

景點
去旅行，又點少得去景點影相呢？講到日本嘅景點，當然係要去神社祈願啦！依家只要預訂指定嘅放題套餐同讚好餐廳嘅粉絲專頁，就可以獲得繪馬一個，可以根據個人喜好寫上願望，掛上特製嘅繪馬架之上，影張相打卡，輕輕鬆鬆就去咗一個日本景點啦！

手信
去旅行又點少得買手信呢？特別係我哋嘅鄉下日本呀！喺餐廳就可以買到丸久小山園嘅優惠套裝，我哋之前曾經試過佢嘅蛋捲，茶味濃郁，一試難忘。原來佢哋嘅茶葉係喺宇治小倉栽陪同製造，以茶為本，生產日本最高級別嘅茶葉，已經接近八百年歷史。依家喺餐廳就可以用優惠嘅套裝價錢$168購買抹茶威化、煎茶茶包同抹茶水晶糖添呀！一於買份番去，同同事一齊開心share日本之旅。

牛八和牛燒肉屋 Express Gyuhachi Wagyu Yakiniku Restaurant Express
地址：尖沙咀彌敦道100號The ONE5樓L501號舖
電話：+852 3565 5446
營業時間：星期一至四 12:00 – 16:00、18:00 – 22:00；星期五至日 12:00 – 22:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com