來自溫哥華的越南風味 灣仔Pho 778

（更新：已結業）

晚晚都排晒長籠，搞邊科呀？呢間位於灣仔嘅Pho 778，新開張無耐，晚晚都排晒長籠，今日我同M佬一於去睇睇入面發生咩事先得！原來呢間餐廳嘅創店人3年前由溫哥華回流香港，但一直好懷念溫哥華嘅越南味道，所以就鑽研咗呢個湯底呢個味道！

PHO 778火車頭湯河粉（XL）

 

食物上枱之前，不妨睇睇佢嘅建議食法，咩都未加之前，先試試個湯底，再加入青檸、芽菜同九層塔，最後，可以加啲海鮮醬同是拉差辣醬調味！終於上枱喇，呢個加大碼嘅size真係好驚喜呀，大大個碗，超多河粉，配料仲十足添！先試試個湯先，湯底唔覺有味精，味道好香濃，牛味夠晒豐富。之後就係落青檸、芽菜同九層塔，湯底嘅味道層次即刻提升咗好多。至於配料方面，有牛丸、生牛肉、牛坑腩同牛筋：牛丸夠晒彈牙、牛筋軟綿綿、牛坑腩夠晒腍身。而最驚喜嘅就係生牛肉，因為佢唔係用普通嘅雪花肥牛，而係用上安格斯牛肉，油脂比例分佈平均，肥瘦適中，肉質嫩滑，肉味甚濃！河粉夠晒滑溜，正。

 

 

越南手絲雞越式法包

 

除咗河粉，越式法包都係招牌菜，法包有成隻半手掌咁大，店員仲好好咁幫我哋cut half！法包脆卜卜，唔硬，雞絲粉量好多，多到邊食邊跌，包入面夾住生菜、蕃茄、香葉等蔬菜，夠晒Fresh。

 

 

而所有飯量、麵類或包類都可以加$15轉餐，餐除咗有小食，仲包罐裝或紙包飲品！

香茅雞翼

 

加餐嘅香茅雞翼有2隻，即叫即炸，皮脆肉嫩，香茅味濃！

香茅蝦餅

 

加餐嘅香茅蝦餅有2塊，脆卜卜夠晒香口，用上鮮蝦肉打成，食落彈牙！

鹹檸七

 

加餐轉特飲，補錢就得！近排食咗咁多煎炸嘢，最啱就係一杯鹹檸七，護嗓潤肺啦！

 

Pho 778
地址：灣仔灣仔道177-179號保和大廈地下F號舖
營業時間：星期一至日 11:00-22:00
電話：+852 2877 2223

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
報料或合作：aandmdiaryhk@gmail.com