天丼金賞獎 旺角天吉屋

喺日本咁多樣美食當中，A姐就最鍾意刺身同壽司，而我就最鍾意食拉麵同天婦羅，但喺香港市場，天婦羅好似成日都被人遺忘咁。好彩呢間連續五年榮獲日本丼聯盟 – 天丼金賞獎嘅天吉屋終於由日本嚟到香港朗豪坊。天婦羅控當然要去朝聖啦。不過，想食就要早啲去到排隊喇。

呢到嘅餐牌全部都係天丼，由於係即叫即炸，所以要耐心等候。點餐後，店員就會送上沙律菜，切成幼絲嘅椰菜清甜爽脆，加上柚子醋就更加開胃，更重要係無限添加。

而枱上除咗調味料仲有漬物，分別係牛蒡同蘿蔔。牛蒡嘅醬油味香濃，夠晒爽口；而蘿蔔就用白醋醃製，酸酸哋好開胃，口感爽脆。而呢度嘅茶牛蒡茶，夠晒誠意。

天幕御膳
天幕御膳嘅天婦羅有黑虎蝦、海紅鯛配紫蘇葉、軟殼蟹、洋蔥、魷魚、茄子、南瓜、炸紫菜同四季豆。炸物香酥脆口，炸漿好薄，但重點係唔會炸得over，入面嘅食材仲好新鮮，亦無損食材本身嘅味道。最驚喜係黑虎蝦，蝦身夠厚，好有口感；另外，南瓜超甜，好滿足。而其實天幕御膳有三種食法：首先可以用中間嘅天婦羅汁配蘿蔔熔，直接將天婦羅點嚟食；第二個食法就係用天丼醬汁拌上白飯同天婦羅；而第三個食法就係鰹魚湯泡飯。我就最鍾意濃味嘅第二種食法。順帶一提，天幕御膳嘅白飯係無限添加架。

天吉屋 TenkichiyaLung
地址：旺角亞皆老街8號朗豪坊11樓25-29號舖
營業時間：星期一至日 12:00 – 22:30
電話：+852 3105 0986

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
報料或合作：keepintouch@aandmdiary.com