清淡高質邊爐 寶哥火鍋味館

我哋成日都打邊爐架，真係打極都唔厭架。不過，食得多都唔健康，所以要識揀識食，今日就嚟到佐敦嘅寶哥火鍋味館，呢度嘅湯底唔會死鹹，仲有好多有質素嘅配料，都算唔錯架。而地下仲有酒窖，想同朋友邊食火鍋邊飲紅酒，真係夠晒嘆！

刺身拼盤

一坐低店員就送上刺身拼盤，刺身底下有雪底以保持新鮮。而多款刺身中，最吸引嘅就係和牛刺身，肉味香濃，入口即熔；至於，另一款A姐最愛就係甜蝦刺身，蝦身夠晒彈牙，蝦頭有好多膏，唔錯。

滋潤雪蓮果印度椰子湯

店內有多種唔同嘅特色湯底，例如有香茜皮旦魚骨腩湯、特色潮卅湯、日式鰹魚味噌湯、番茄牛坑腩湯、天麻川芎祛風大魚頭窩、馳名寶寶雞煲等，由於我哋今日想清淡啲，所以揀咗滋潤雪蓮果印度椰子湯，湯嘅顏色奶白，椰子味香濃，湯底鮮甜清淡。仲有兩大隻豬踭，肉味香濃。湯底係誠意之作，下次好想試另一款湯底。

招牌炸響鈴

炸響鈴即叫即炸，腐竹味香濃，最重要係唔太油膩。落湯黃金3秒後，依然十分脆口，索晒椰子湯汁之後，好好味呀。

招牌三寶丸

招牌三寶丸絕對係必叫之選！三寶丸包括墨魚丸、蝦丸同鯪魚球。首推裏面有大量墨魚粒嘅墨魚丸，夠晒彈牙，墨魚味濃郁；鯪魚球入面有蔥花同髮菜，最重要係無腥味；蝦丸用上新鮮蝦肉，口感夠晒豐富。

澳洲M9霜降和牛

油脂分佈細緻均勻，肉質鮮嫰，牛味濃郁，物超所值！

海鮮拼盤

拼盤中有蜆、蟶子、蝦等等。脆肉鯇魚腩就係M佬最愛，魚味鮮甜，肉質結實彈牙。

至於店員嘅服務相當唔錯，除咗自動幫你加湯，仲提你要留意食物時間。

寶哥火鍋味館 Po Po Gourmet and Wine Cellar
地址：佐敦長樂街8號文興樓地下至2樓
營業時間：星期一至日 17:30-02:00
電話：+852 2332 0998

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
報料或合作：keepintouch@aandmdiary.com