茘枝角遇上長沙灣 街口轉角小Cafe – Chitose
（已結業）
無論係由茘枝角地鐵站出發嘅A姐，定係由長沙灣地鐵站出發嘅M佬，只要有緣份，總會喺街口轉角嘅小Cafe相遇！因為緣份令佢哋喺Chitose相遇，所以今日嘅晚餐就相信命運，開餐喇！
呢度嘅二人套餐已包2款頭盤小食、2個主菜同2杯飲品，都係HK$258，熱愛雞翼嘅A姐，仲要加多份香脆炸雞翼先得。晚餐嚟講免加一真係好抵食！
香脆炸雞翼
熱辣辣、脆卜卜，好香呀！雞翼本身有醃過，所以味道已經相當唔錯，加埋甜甜酸酸嘅秘製醬汁，令雞翼更加惹味！真係好想encore再叫多幾隻！
胡椒牛油煮鮮蜆
呢個同香口濃味嘅雞翼相反，只係用上少少胡椒同牛油，將成個蜆味帶出，唔會搶晒蜆嘅風頭！而且都有成廿幾隻蜆，粒粒都彈牙又無沙，M佬一個人就食咗十八隻喇！
惹味牛栢葉
店員嘅極力推介，其實味道有啲似撈撈小食，不過，餐廳版本當然唔會咁簡單，呢度味道層次複雜好多，醬汁又辣又濃，仲有少少甜甜哋添！最重要係牛栢葉夠入味，又爽脆，唔怪得之店員咁落力推介啦！
喇沙湯大蝦海鮮粉絲
湯底用馬來西亞出名嘅喇沙湯，加埋足料海鮮，好似青口、鮮蝦、魚柳，仲有炸響鈴同豆卜，單睇賣相都相當吸引！而食湯麵，最重要一定係個湯底，少少辣但就好有椰香，啲粉絲吸收哂精華！好味！
香煎春雞配飯
成個晚餐，可能之前幾道菜都好吸引，到最好嘅燒春雞就有少少失色，雞肉比較鞋口，同唔夠汁。不過，份量相當多，叫店員加啲汁其實都OK㗎。
OREO奶昔
如果我唔係臨尾先叫嘢飲，我一定飲到飽飽食唔落飯！呢杯OREO奶昔，用咗好多OREO，好濃好好味呀！冰感夠哂重，好正！最重要唔會話甜到唔想飲落去，總之就好好味！早知就唔食飯，齋飲呢杯OREO啦！
荔枝峰蜜紅茶
呢個紅茶比較普通，有荔枝肉係驚喜嘅，不過入口偏甜。
A姐M佬食飽飽之後，唔駛向左走向右走喇，哂吓月光先再坐巴士一齊返屋企啦！
Chitose
地址：深水埗昌華街23號地下16號舖
營業時間：星期一至六: 12:00-21:30
電話：+852 5409 4649
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
報料或合作：aandmdiaryhk@gmail.com
