佐敦超長時間放題打邊爐 鍋霸吃到飽台式養生火鍋
高質嘅食材、濃郁嘅湯底係打邊爐嘅基本盤，但同成班friend興興奮奮打得火熱之際，個店員同我哋講夠鐘，真係好掃興呀！所以要搵間無限時放題火鍋或超長時間放題打邊爐先夠盡興。嚟到佐敦嘅鍋霸吃到飽台式養生火鍋，用餐時間多達4個半鐘，大家傾得飽又食得夠飽，咁先至滿足。
火鍋湯底
火鍋湯底有成20款，由壽喜燒湯底、麻辣湯底、椰子雞湯底到藥膳養生花膠雞湯底、養生蟲草花桃膠雞湯底等，有辣有唔辣，有淡有濃口味，任君選擇，而我哋就揀咗田園蕃茄濃湯雞肉涮涮鍋同藥膳竹笙雜菌鍋。濃稠嘅蕃茄湯非常香濃，味道酸酸甜甜，夠晒醒胃！至於藥膳竹笙雜菌鍋係我哋嘅推介，雜菌嘅香味真係一試難忘，特別係將啲蔬菜、粟米放入藥膳竹笙雜菌鍋，完美索晒清香嘅湯底，提升至另一種鮮甜味。
前菜
店員貼心先上兩款前菜，包括涼拌黑本耳同拍青瓜，等緊湯底上枱前都可以食住等，預先幫我哋醒胃！
美國牛肩胛肉
同唔少火鍋放題一樣，餐廳根據牛肉嘅質素，定為不同價錢，我哋就揀咗Lv2嘅美國牛肩胛肉。以呢個價錢嚟講，呢個美國牛肩胛肉確實抵食，油花分佈平均，估唔到仲有雲石花，牛肉味香濃，值得一再encore！
西班牙無激素豬肉片
至於豬肉方面，鍋霸吃到飽台式養生火鍋選用西班牙無激素豬肉片，肉味香濃，肉質軟腍，同樣高質。
海鮮
除咗牛肉同豬肉之外，海鮮都係唔少人打邊爐嘅焦點。鍋霸吃到飽台式養生火鍋嘅海鮮包括蜆、生猛海蝦、脆鯇魚片、脆骨腩、白鱔片、新鮮魚雲、深海魚柳等，其中蜆肉大大粒，非常鮮甜！
其他火鍋配料
鍋霸吃到飽台式養生火鍋嘅火鍋配料選擇非常多，特別推介自家手工製作嘅丸類同餃類，包括手工墨魚丸、手工黑松露墨魚丸、手工黑松露墨魚滑、手工潮汕豬肉丸、手工梅菜豬肉丸、手工麻辣牛丸、手工牛丸、手工白菜豬肉餃、手工韭菜餃、手工香菇雞軟骨餃、手工麻辣栗米豬肉餃等，全部都非常新鮮！
自家飲品
除咗汽水、罐裝同紙包裝飲品之外，鍋霸吃到飽台式養生火鍋都有提供唔少自家出品嘅飲品，例如自家烏梅山楂茶、台灣黑糖冬瓜檸檬茶、冷泡桂花烏龍茶等，夠健康之餘又解渴！
雪糕
食飽飽就梗係要食雪糕啦！鍋霸吃到飽台式養生火鍋提供Häagen-Dazs、Mövenpick同DREYER’S®嘅雪糕同甜筒，作為飯後甜品，非常滿足。
鍋霸吃到飽台式養生火鍋 Hotpot King
地址：佐敦彌敦道219號莊士倫敦廣場6樓
電話：+852 5933 1900
營業時間：星期一至日 12:00 – 00:00
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
