下一站天后 地道川菜見見面
「下一站天后」，喺天后落咗車經A出口行出嚟，就有唔少餐廳選擇，菜式選擇非常多，而且大部份餐廳價錢比附近嘅大坑親民，真係花多眼亂。不過，近排天氣實在太熱，最啱就係食辣野刺激下食慾啦！所以我哋去到見見面，以川辣作為今晚嘅主題。
開心涼粉
食甜嘢會令人開心，望住對方食辣食到標晒眼水都同樣開心。呢個開心涼粉其實係麻辣涼拌涼粉，涼粉上灑上芝麻蔥花。涼粉爽口滑溜，涼粉掛上麻辣汁，不失為好好嘅開胃菜。
麻辣牛柏葉
索晒麻辣汁嘅牛柏葉絕對夠驚喜！牛柏葉口感爽口，雖然切得幼身，但就索盡麻辣汁。麻辣比例啱啱好，非常有層次，不過略嫌份量偏少。
烤海鱸魚+萵筍
今晚嘅主菜就揀咗烤魚，魚類選擇有桂花魚、海鱸魚同青江魚。呢道餸絕對係誠意之作，因為魚身有事先略為煎左，魚肉不會散碎，亦吸咗唔不少湯汁。海鱸魚雖然無桂花魚咁滑，但肉質相對彈牙，而且魚骨唔多，啱晒怕骨嘅朋友。至於烤魚嘅另一個精粹係啲配菜，呢度嘅配菜有魔芋、雲耳、芹菜同比較少見嘅馬鈴薯寛粉。不過個麻辣汁愈煮愈濃，越食越鹹又麻又辣，需要加湯稀釋一吓。我哋另外加咗萵筍，切得厚薄適中，唔需要煮太耐就已經軟身，食得！
炸饅頭（6件）
上菜前店員主動幫我哋換上乾淨嘅碗碟，避免屬於甜食嘅饅頭沾到碗入面嘅麻辣汁，呢個細心舉動值得一讚！饅頭size比平常食開嘅細粒啲，兩人都食得曬。饅頭炸到金黃酥脆，除咗增加飽腹感，亦係一個唔錯嘅飯後甜品。
見見面 Ho Ho Kitchen
地址：天后琉璃街9號地下
電話：+852 2658 9868
營業時間：星期一至星期日 11:00 – 23:00
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
