尖沙咀粉色打卡餐廳 春禧堂台灣料理餐廳
依家開餐廳真係唔簡單，除咗食物嘅質素要好，如果餐廳嘅環境夠靚，有打卡影相嘅位置，絕對係一個加分嘅重點，至少A姐就係咁諗！今日嚟到位於尖沙咀中港城嘅春禧堂台灣料理餐廳，餐廳門口有一個粉藍色嘅打卡佈置，少女心嘅你真係唔可以錯過，加上餐廳可以欣賞維港兩岸景色，連食物都唔錯，值得推介。
古早味滷水拼盤
呢個小食拼盤有腱心牛肉、牛肚、雞翼同滷水蛋，再配搭一小碗上湯小棠菜。每款食物都非常入味，滷水味又香又濃！腱心牛肉同牛肚嘅牛肉味香濃，口感軟腍；至於雞翼嫩滑夠juicy！份量十足，每樣食物都有兩件，啱晒兩個人食！
紅燒半筋半腩牛肉麵
嘩！呢個午餐好大碗呀！首先麵底超多，掛湯力十足，配料有小棠菜、紅蘿蔔同白蘿蔔；至於牛肉三寶就有牛展、牛筋同牛腩，全部都好入味，特別鍾意牛腩，非常軟腍，肉味香濃；而牛筋非常軟綿，骨膠原十足！我哋就加咗麻辣湯底，但就略嫌唔會太辣，啱晒食開小辣嘅朋友。
香酥炸排骨配小時候牛丸湯麵
呢個下午茶套餐可以選擇upgrade將份主食加大，所以呢碗小時候牛丸湯麵係加大嘅份量，麵底十足配有兩粒彈牙牛丸！至於排骨香酥炸排骨即叫即炸，非常脆口，而且超大塊，下午茶嚟講非常抵食！
台式珍寶套餐
另一款下午茶就叫咗台式珍寶套餐，同樣地，意想不到份量超多，真心非常抵食！配料有鹽酥雞排、滷水蛋、地瓜條、台灣腸同涼拌三小碟。台灣腸油香十足，外皮香脆；地瓜條同鹽酥雞排即叫即炸，夠晒熱辣辣！
茉香珍珠綠茶、黑白配珍珠豆乳
午餐同下午茶都達埋飲品，真係尖沙咀區內嘅抵食推介！
台灣鳳梨酥
最後，我哋仲買埋盒台灣鳳梨酥做伴手禮，為呢個有打卡、有美食、有禮物嘅偽台灣行程畫上完美句號。
春禧堂台灣料理餐廳 Chun Xi Tang
地址：尖沙咀廣東道33號中港城2座平台3號舖
電話：+852 2861 1826
營業時間：星期一至日 11:00 – 21:00
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
