必食海南雞 亞參雞飯

成班同事出街食lunch，最開心就係嗌到成枱嘢，大家happy share，咁就可以試到多啲款式啦！平時多數都係飲茶嘅我哋，今日就轉場試吓南洋野，刺激一吓味蕾，所以嚟到亞參雞飯，尋覓99分嘅海南雞飯！

馬來斑蘭咖央多士
咖央多士係用厚多士，非常迎合香港人嘅口味，夠晒脆非常有口感！另外，牛油同咖央嘅比例啱啱好，非常香滑，斑蘭味香，記住要趁熱食啊！

香煎手作蝦餅
蝦餅一碟三件，新鮮熱辣即叫即煎！蝦餅夠厚身，咬開就見到入邊有唔少蝦膠同蝦肉，夠晒新鮮彈牙。

香烤豬肉串
豬肉串烤到外脆內嫩，豬肉味濃，一咬開就會爆汁，好juicy！

馬拉盞怡保芽菜
餐廳對食嘅要求非常執着，連芽菜都係由馬來西亞嘅怡保空運到港，條條都非常飽滿，食落清甜爽脆，每日限量供應食晒就冇啦。

亞參去骨海南雞飯
呢個飯餐會配上雞香飯同清雞湯，未食雞之前，先試一啖飯，油香十足，唔錯；而清雞湯因為用上大量雞骨熬製，所以係精華所在，雞味濃郁，非常滋味。至於飯餐嘅海南雞，估唔到份量非常多，全部都去晒骨，肉質嫩滑。

亞參去骨海南雞 – 半隻
由於我哋幾個人share，所以除咗飯餐，另外叫咗半隻海南雞。亞參嘅海南雞選用三黃雞，肉汁豐富，雞皮唔算肥，所以都忍唔住食咗幾塊，非常滿足。當然食海南雞就要配上秘製嘅三色醬一齊食啦，咁至夠惹味！

亞參豬手
例牌嘅豬手份量都唔少，炆得夠腍夠入味。豬手嘅表層，一啲都唔肥，充滿骨膠原！

新加坡喇沙米線
喇沙米線嘅配料有蝦、雞蛋、豆腐卜、魚片、芽菜、通菜，以新鮮黃薑、南洋香料同椰汁烹調，香辣開胃。米線上晒湯，淡淡都好濃郁，係必叫之選。

薏米水、柑桔特飲
最後當然要飲番杯南洋特飲啦，薏米分量十足，一啲都唔馬虎，充滿濃香嘅薏米味；至於金桔特飲，酸酸甜甜，夠晒醒胃。

亞參雞飯 Asam Chicken Rice
地址：銅鑼灣波斯富街99號利舞臺廣場1樓102號舖
電話：+852 2363 6266

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com