深水埗名人飯堂 鮑參翅肚大撈家
喺深水埗買完嘢，返屋企前諗住食番碗車仔麵，點知發現深水埗竟然開咗一間主打鮑參翅肚嘅名人飯堂？不過，唔好以為食鮑參翅肚就一定好貴；相反，餐廳選擇喺深水埗開店，價錢走大眾化，而質素亦有一定水準，呢間大撈家完全係充滿驚喜同誠意嘅小店！
鮑汁雞翼、鮑汁扒時蔬
將色澤深褐、味道鮮美、香氣濃郁嘅鮑汁淋上去雞翼同時蔬之上，真係無得輸呀！菜心嘅味道即刻level up；而雞翼非常入味，值得推介。
糖心蘿蔔
至於糖心蘿蔔真係人如其名，非常清甜，完全無渣，夠晒入味。
海蔘襟撈
呢個系列可以揀撈家鮑魚汁或者秘製麻辣汁，而我哋就梗係揀鮑魚汁啦！上枱時候真係嚇一嚇，個海蔘同冬菇都超巨型呀！海蔘軟腍又有膠口感覺，至於花菇充滿口感，重點係雖然大大隻，但都非常入味，啖啖都充滿香濃嘅鮑汁。至於撈麵亦唔係一般嘅粗麵，餐廳選擇用墨魚麵，除咗成本提升之外，更重要係原來做撈麵麵底又幾夾喎！ 另外，所有襟撈系列都會奉送朝鮮人蔘湯，湯底每啖都有淡淡回甘嘅人蔘味，真係一個奢華享受嘅套餐！
朝蔘花膠湯麵
上枱一刻已經聞到香氣濃郁，帶有淡淡回甘味嘅人蔘湯底，絕對係回味無窮。配料除咗有冬菇之外，仲有巨型花膠，望落去已經充滿氣勢！至於味道非常入味，啖啖都充滿香濃嘅鮑汁，軟腍又有膠口感覺，真係充滿驚喜同誠意呀！
大撈家
地址：深水埗福榮街101號地舖
電話：+852 2827 8578
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
