無得去美國惟有去New York Diner紐約客食美國菜頂住檔先

（已結業）

啲男人成日下巴輕輕，之前應承人今年同我去美國，依家10月啦，連去整簽証都無聲氣。唉，一定係無咗件事啦! 今日同佢講先解釋今年去唔到，話帶我去住食美國菜先，下年一定去到喎 (聽住先啦，睇下點)。

美國菜? 什麼星期幾餐廳呀? 食過啦! 原來係去銅鑼灣 New York Diner 紐約客，一入到去就見到好多顏色同牆上有塗鴉，當中有唔少New York element。

一個主菜加25蚊先可以轉餐，有湯或沙律同野飲。我哋加咗1個25蚊，嗰蕃茄蓉湯，十分正常，好香蕃茄味，係足料嘅。

反而跟餐嘅蜂蜜檸檬水有驚喜，唔係平時茶餐廳嗰種，可能係因為加咗薄荷葉啦，飲落特別清新。

美國菜就梗係要食Burger啦! 我哋叫咗蘑菇牛肉漢堡，牛肉好厚身，最緊要係佢夠Juicy。可能我哋好鐘意食蘑菇啦，覺得啲蘑菇好正。另外，嗰Burger仲有得跟墨西哥脆片 (得Burger可以跟呢個脆片㗎咋，其他主菜只可以揀薯條同薯角)!

我哋仲叫咗嗰美國招牌啤酒烤雞。嘩，成隻雞企係你面前，有無咁勁揪呀! 隻雞燒得唔錯，而且隻雞唔係好大隻，所以啲肉都好嫩。嗱，認真問大家，啤酒係咩味，咪苦味囉! 食落有少少啤酒嘅苦味。M佬用手食完隻雞脾，隻手都有啤酒味。隻雞仲配埋墨西哥薄餅添，真係份量幾大!

呢餐話明係賠罪飯，梗係要叫多個主菜啦! 唔該，要多個香脆大都會咸豬手吖! 啲豬手肉幫你切晒，唔洗煩! 啲皮都幾香脆，加埋嗰啲皮下脂肪，好膠口! 正!

New York Diner 紐約客
地址：銅鑼灣軒尼詩道523-527號澳門逸園中心2樓
營業時間：星期一至日: 12:00-22:00
電話：+852 3543 0218

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬玩樂日記

Instagram：AandMdiary

Pinterest：AandMDiary

Openrice：A姐M佬