讓大排檔情懷走進酒店自助餐 尖沙咀Three on Canton
香港嘅酒店自助餐雖然豐富，但食得多都會悶啦，所以餐廳不定期都會更新主題，而近期最能俘虜我個心，就係港威酒店Three on Canton嘅大排檔打冷主題喇！雖然主打本土貼地路線，但打冷出品絕不馬虎，加上海鮮、刺身、牛扒、羊脾等高質食材，選擇應有盡有，非常豐富，性價比極高。
大排檔自助餐
今次港威酒店Three on Canton嘅酒店自助餐以大排檔打冷為主題，成為近期人氣極高嘅酒店自助餐，想食嘅記住提早致電預訂呀！
打冷
點解港威酒店Three on Canton嘅大排檔打冷最能俘虜我個心？就係因為平時打冷嘅熱門菜式都有齊，食得非常盡興！肉嫩鮮甜嘅大眼雞魚、以濃郁秘製滷水汁熬製嘅鹵水鴨片同潮州拼盤、香濃入味嘅韮菜豬紅，仲有香辣彈牙嘅辣酒煮花螺。但講到我嘅最愛，就係潮式蠔餅同蠔仔粥！兩款嘅蠔仔份量都非常多：潮式蠔餅嘅蛋皮雖然未算鬆化，但蛋味香濃而蠔仔飽滿鮮甜，充滿口感；至於蠔仔粥雖然係飽肚之物，但粥底因為加入咗大量蠔仔、大地魚等配料，所以粥底非常鮮甜，仲細心用埋大排檔常見嘅碗，真係好味得嚟又可以打卡呀！
大排檔美食
除咗打冷菜式之外，另一驚喜係大排檔嘅鑊氣小炒。炸到非常香口嘅素腐皮卷同椒鹽豬扒都係我嘅推介！不過，港威酒店Three on Canton嘅酒店自助餐，每日供應嘅菜式都可能略有不同，唔知你又會有咩驚喜小菜呢？
冷盤海鮮、刺身
被譽為自助餐回本必食嘅冷盤海鮮同刺身，當然唔可以錯過。冷盤海鮮有龍蝦鉗、鱈場蟹腳、凍蝦、翡翠螺、小龍蝦，首推當然係大大隻嘅龍蝦鉗，龍蝦鉗勁多肉，而且肉質非常鮮甜！另外，每款食材下都有寫上原產地，食得非常放心。至於刺身就有三文魚、八爪魚、北寄貝同玉子，以酒店自助午餐嚟講，真係超豐富！
烤肉區
唔少酒店自助餐，烤肉區通常都係得兩款選擇，但港威酒店Three on Canton竟然多達7款！牛扒、羊脾、烤雞、豬腩肉、火腿等，肉食人士一定非常滿足。
其他選擇
雖然港威酒店Three on Canton今期以大排檔為主題，但其實自助午餐嘅選擇真係非常國際化。有港式點心、印度咖喱、麵檔、芝士火鍋、芝士及火腿拼盤等，選擇豐富，性價比超高，大家記住要帶多一個胃嚟呀！
甜品
好彩甜品係屬於另一個胃，如果唔係真係搞唔掂呀！芝士蛋糕、奶凍、芒果布甸、雪糕、黑森林、心太軟等，但講到港威酒店Three on Canton最signature嘅甜品，就係足足長4米嘅拿破崙蛋糕！長4米嘅拿破崙蛋糕除咗適合打卡之外，味道仲要相當唔錯！一層又一層嘅拿破崙蛋糕非常鬆化，忘滿口感，甜度適中，必定要試。
飲品
為咗切合主題，港威酒店Three on Canton嘅自助午餐，除咗酒店自助餐常見嘅果汁、茶及啡之外，仲有港式奶茶、港式檸檬茶，全部都係無限任飲。想再刁鑽啲，亦有提供港式紅豆冰（需另外收費），紅豆粒粒飽滿，充滿港式風味呢！
Three on Canton
地址：尖沙咀廣東道13號海港城港威酒店3樓
電話：+852 2113 7828
營業時間：星期一至日 07:00 – 23:00
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
