超濃郁蕃茄湯 上環勝香園

大排檔絕對係老香港的代表，而上環嘅勝香園絕對係我最喜愛嘅傳統港式大排檔！平日食飯時間，總係大排長龍，所以今日特登同A姐揀weekend嚟，人龍無平日咁多，等咗一陣就有位啦！勝香園除咗好味，仲有人情味，因為每次嚟到，見到依舊嗰班侍應婆婆，仍然身壯力健，就覺得好安慰。

牛油檸檬汁蜜糖脆脆
嚟到勝香園，又點少得招牌嘅檸蜜脆脆？酸酸微微嘅檸檬汁，好清新又開胃！至於個包就超脆，口感如餅乾般鬆脆。

奶油脆脆
奶滑油香，甜甜哋，好好味！同樣哋，佢個脆脆係永無失望咁鬆脆！

蕃茄鮮牛肉午餐肉通粉
牛肉份量唔算太多，但午餐肉就有兩塊，當然重點係蕃茄湯底啦！湯入面勁多蕃茄蓉，每一啖都係充滿濃郁嘅蕃茄香味，真係唔覺意就飲晒成碗湯啦！

蕃茄豬扒蛋通粉
豬扒預先整過，所以夠晒香口，但就略嫌份量少左啲。同樣地，重點當然係蕃茄湯底啦！蕃茄絕對冇偷工減料，我甚至覺得，啲蕃茄應該係唔使錢嘅，因為真係超多蕃茄蓉啊！不過，一向怕食酸野嘅A姐就話略嫌酸咗啲啲。