爸爸烤串：在倫敦走進串燒的無間地獄

唔知點解每次食串燒都控制唔到自己，望住個餐牌，每串好似一角幾毫，所以叫吓叫吓就越叫越多，最後銀包就好似跌咗落無間地獄，而今次嘅串燒地獄就嚟到倫敦嘅爸爸烤串。位於倫敦唐人街嘅爸爸烤串，枱面上設有自轉烤爐，將串燒放上烤爐上，串燒平均受熱，味道同儀式感同樣俱備，但食之前記得睇吓銀包有幾多錢呀！

爸爸烤串

食串燒又點少得雞腎呢！爸爸烤串嘅雞腎非常爽口，加上辣粉同孜然粉嘅調味，更為惹味！

爸爸烤串嘅牛舌取自舌心位置，肉質口感豐富，鮮嫩無比。

肥瘦相間，烤爐將五花肉嘅油粉迫出，加上焦香味，去爸爸烤串食串燒又點少得佢呢！至於爸爸烤串嘅肥腸處理得非常乾淨，軟糯嘅口感真係肥腸先俾到你咋！

至於爸爸烤串嘅雞翼同韭菜就由廚房製作後再上枱，略嫌雞翼比較細隻；而韭菜獨特嘅香味加上濃郁嘅調味，重口味人士又點可以唔叫呢！

講到成餐飯最正嘅當然係炸饅頭啦！爸爸烤串嘅饅頭炸到金黃色，脆卜卜嘅外皮包裹住軟心嘅麵包，但最正嘅當然係加上大量煉奶，咁到係識食！

食串燒當然唔平，但爸爸烤串勝在可以無限加飯呢，幫你增加飽腹感！呢碗招牌紅燒牛肉飯嘅牛肉份量十足，肉質軟腍，而且炆得夠入味，性價比爆棚！

餐廳名稱：爸爸烤串 Belt Noodles
地址：19B Rupert St, London W1D 7PA
營業時間：星期一至日 12:30 – 23:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！