風味食堂：在倫敦唐人街遇上老北京的風味

想食得盡興，任食火鍋當然係一個唔錯嘅選擇。喺倫敦常見嘅任食火鍋，以川式麻辣湯底為主，而位於唐人街嘅風味食堂，就將老北京銅鍋帶到嚟倫敦，以炭火火鍋作賣點，真係瞬間返到去清朝，啱晒大家打卡啦！除咗呢啲儀式感之外，風味食堂嘅配料選擇都唔少，而且上菜速度快又無漏單，夠晒豐富同滿足。

風味食堂

等緊火鍋上台，店員就先送上紅柳大串同酥餅作為餐前小食。而所謂紅柳大串即係羊肉串，加上辣粉同孜然粉嘅調味，惹味之餘，仲蓋過羊肉嘅臊味；至於酥餅非常鬆化。

風味食堂嘅湯底選擇多，但如果揀北京銅鍋，因為鍋嘅面積有限，加上鍋嘅溫度相對較高，所以只可以揀清湯。雖然話係清湯，但其實鍋內有蕃茄、杞子同青瓜吊味，唔會話好單調。

風味食堂嘅北京銅鍋以炭火加熱，所以湯底嘅溫度相對較高，牛肉只要輕輕淥幾秒就已經變得粉嫩，加上牛肉肥美，值得我哋encore！

每次打邊爐，我哋都好鍾意叫雞！因為雞肉可以增加湯底嘅鮮甜味，而且黃油雞皮香肉嫩，油香滿溢。

除咗以上嘅推介，風味食堂嘅火鍋配料選擇非常多：茼蒿、金菇、豬肚、肥腸、午餐肉、魚蛋、魚腐等超過50項，真係夠晒滿足呢！

餐廳名稱：風味食堂 Real Beijing Food House
地址：46 Gerrard St, London W1D 5QH
營業時間：星期一至六 12:00 – 22:30、星期日 12:00 – 21:30

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！