【高雄景點】高雄大魯閣草衙道 上機前的最後衝刺
【高雄景點 | 高雄大魯閣草衙道】A姐：嚟咗高雄咁多日，都無shopping，仲有4個鐘先上機，我唔制，我要shopping！我要shopping！我要shopping！
其實嚟咗高雄咁多日，日日都陪A姐行街睇景點，我就咩都無玩過，仲有4個鐘先上機，去邊度好呢？不過，4個鐘話多唔多，話少唔少就最尷尬。好彩2016年5月開幕嘅高雄大魯閣草衙道，除咗係一個大型商場，仲有戲院、保齡球、同鈴鹿賽道樂園，最重要係離高雄國際機場捷運站只有1個站距離，上機前一於你有你shopping，我有我去玩啦！
坐高雄捷運紅線喺草衙站2號出口一出就見到一座號稱全台最大，可以坐88人嘅旋轉木馬喇！
不過，去機場前拎住大件行李點算好？好彩呢度有唔同size嘅儲物櫃，去玩之前放好行李，真係輕輕鬆鬆鄧梓峰！
高雄景點 | 高雄大魯閣草衙道 | 購物商場（by A姐）
高雄景點 | 高雄大魯閣草衙道 | 購物商場分為大道東同大道西，各樓高3層，其中1樓同2樓都係大家買嘢shopping嘅地方，而3樓就係food court同各項娛樂設施，好似戲院同大魯閣棒壘球打球場。
記住呢度唔係outlet，所以shopping買嘢唔算特別平，但細心搵搵，再考吓自己時代觸覺，都尋到唔少寶架。
呢度有唔同品牌，好似H&M、The North Face、Roots、Kipling、Timberland、Levi’s、Lee、EDWIN、NIKE、adidas、puma、new balance、UNDER ARMOUR、Mizuno……你話吖，4個鐘又點會夠行喎！
至於食肆都有唔少選擇，有豆腐村、花月嵐拉麵、勝博殿、一番地、百八漁場、牧島燒肉、定食8、貳樓餐廳、頂呱呱、繼光香香雞、同我最鍾意嘅春水堂呀！
至於商場入面仲有大魯閣棒壘球打球場，食飽飽可以入去做吓運動，玩吓棒球、保齡球、投籃、飛鏢等，周身郁吓再血拼過！
而值得一讚嘅係對於小朋友同BB嘅配套極為完善，除咗有育嬰區同兒童專用座廁板之外，仲有BB車租添。
最後，當然唔少得買埋手信再出機場啦！
高雄景點 | 高雄大魯閣草衙道 | 鈴鹿賽道樂園（by M佬）
高雄景點 | 高雄大魯閣草衙道 | 見到呢部咁有歐洲style嘅草衙道電車，後面就係全球唯一一個被日本鈴鹿賽道授權嘅海外樂園，仲要唔收入園費添，但想玩嘅就要逐項設施收費，好彩，價錢一啲都唔貴。
鈴鹿賽道樂園分為三大主題區：迷你鈴鹿賽道、小小城市、技能培訓村。
迷你鈴鹿賽車場
將曾舉辦世界一級方程式嘅日本鈴鹿賽車場按比例縮小而成，但賽道仍保存了八個關卡，包括髮夾彎、連續 S 形彎、8 字交叉隧道等等，而且賽車速度夠晒快，過每過關卡都夠晒刺激，真係好有一級方程式嘅快感！賽車完結之後，仲會顯示大家嘅成績，好彩我無包尾姐！
天空飛行家
樂園雖然無過山車，但呢個天空飛行家，就係全場最多尖叫聲嘅設施。坐住佢係天空翱翔，狂轉你30幾圈，雖然好驚，但真係好好玩，好彩A姐無嚟玩，如果唔係實嚇死佢。
摩天輪
天荒地老流連在摩天輪，在高處凝望世界流動……每次坐摩天輪都會哼起呢首歌，唔知你又會唔會呢？呢部摩天輪配合賽車主題而造成車軚外形，而且半開放式設計，再轉你幾圈睇風景。咦！我好似見到A姐攞住5-6袋戰利品喎。
小小車手樂園
其實小朋友都有好多啱玩嘅選擇，呢個小小車手樂園有摸擬公路嘅交通，小朋友玩完之後仲可以獲得自己嘅駕駛執照添！不過，我未有小朋友就無得玩喇！A姐，我哋番去生小朋友囉！
最後，玩完再接返shopping完嘅A姐，10分鐘就去到高雄小港國際機場喇！（差啲唔記得攞番件行李添）
世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–
高雄大魯閣草衙道 Taroko Park
地址：高雄市前鎮區中山四路100號（捷運草衙站2號出口）
營業時間：星期一至四 11:00-22:00；星期五 11:00-22:30；星期六 10:30-22:30；星期日 10:30-22:00；特殊營業時間除外
電話：+886 800-786-999
網站：www.tarokopark.com.tw
鈴鹿賽道樂園 Suzuka Circuit Park
地址：高雄市前鎮區中山四路100號（捷運草衙站2號出口）
營業時間：星期一至五 13:00-22:00 ；星期六及日 10:00-22:00（毎天最後售票時間為閉園前 30 分鐘）
電話：+886 7-796-7766
網站：www.suzukacircuitpark.com
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
