最啱小朋友玩 曼谷Dinosaur Planet

相信大家都有睇過《侏儸紀公園》，而我家M佬仲係一得狂迷，仲將當中嘅金句 Life will find its way out（生命會找到自己的出路）成日掛喺嘴唇邊。所以嚟到曼谷，就帶佢呢個大細路去到佔地約12,000平方公尺嘅恐龍星球樂園 Dinosaur Planet，等佢同啲恐龍影吓相。精明嘅我哋提早上Klook買門飛，比現場買飛平接近HK$65，2個人平咗$130，真係可以食多隻海南雞！

恐龍星球樂園分成八大主題區，主要係知識教育同實感體驗，好似係恐龍介紹區、4D探險等等，仲有啱小朋友玩嘅Dino Farm同一家大細都鍾意嘅摩天輪，玩番半日都唔錯。

恐龍區域

呢個室內資訊博覽館，模擬科學家搵到恐龍重生嘅方法（咁未同侏儸紀公園一樣），了解各種恐龍嘅形態、再從唔同嘅片段、模型以及專人講解，俾小朋友從娛樂了解恐龍。最有趣係最尾嘅實驗室，同我哋一齊玩嘅泰國小朋友，全部都喊住走，點解？唔劇透喇。

恐龍之眼

呢個高50米摩天輪，要額外收費每位200銖，咁就可以欣賞到整個恐龍星球樂園嘅景色。

恐龍之星

行入呢個森林地帶，你會見到好多大大小小，1:1嘅恐龍，但睇恐龍最驚就係膠感十足，鄒彩摸上去嘅手感十足，我哋見到好多小朋友都好驚，驚到全程拖實Daddy Mummy。

4D恐龍館

坐住部電梯，落咗去地心，見到好多恐龍呀。講真呢個故事同畫質都相當麻麻，但我哋都好佩服一班泰國小朋友嘅全程投入，由頭叫到尾，好似真係俾恐龍咬咗一啖咁，搞到我同M佬都俾呢班小嘩鬼搞到投入其中。

大火山&恐龍表演

每日都有唔少場次，不過，我同M佬就miss咗無睇到，個表演其實係講火山爆發，地殼變動，令恐龍絕種。睇完記得要同班會走會跑嘅恐龍合照呀。

逃出生天遊戲

全場最多人排隊嘅遊戲就係呢個，遊戲背景講述直升機失事，大家要合力搵番失物，不過，喺搜索時有機會受到恐龍襲擊，好彩逃生嘅過程有M佬拖實我，如果唔係，我實俾恐龍生吞落肚。

恐龍農場

小朋友可以坐住恐龍BB，遊覽一圈！睇吓啲小朋友玩得幾開心。

恐龍廣場

臨走時，記住去到恐龍廣場買吓手信記念品，仲有唔同嘅特色小食架同3D遊戲。

玩後感：我哋建議如果有小朋友先好嚟玩，因為佢哋真係可以喺娛樂中學習，而且小朋友見到恐龍真係好投入好驚但又好好奇。逗留時間約2-3小時。

相關文章：旅行拍拖食買玩 3日2夜曼谷之旅

曼谷恐龍星球樂園 Dinosaur Planet 
地址：544/1 Sukhumvit Rd, Khwaeng Khlong Tan, Khet Khlong Toei, Krung Thep Maha Nakhon 10110, Thailand（坐BTS到Phrom Phong站 6號出口行10分鐘）
時間：星期一至星期五 10:00-20:00；星期六、日 10:00-22:00
門票：成人600泰銖 (約港幣$148)、小童400泰銖 (約港幣$99)
經Klook購買門票：成人港幣$83、小童港幣$54
網址：www.dinosaurplanet.net

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！

Facebook：A姐M佬 玩樂日記
Instagram：AandMdiary
Pinterest：AandMDiary
Openrice：A姐M佬
報料或合作：keepintouch@aandmdiary.com