[香港Staycation] 一生人必住一次 香港半島酒店
每個大城市總有一間極具代表性嘅酒店，而最能代表香港嘅酒店，當然就係全球知名嘅半島酒店啦！半島酒店嘅歷史不知不覺已經超過90年，見證住香港唔同時期嘅發展，更成為香港其中一個知名地標。今年我同A姐嘅周年紀念日就嚟到半島酒店玩Staycation，嘆吓享負盛名，最高級最奢華，補譽為一生人必住一次嘅半島酒店啦！
預訂網址：www.klook.com
酒店大堂
半島酒店位於尖沙咀鬧市，交通非常方便，前往尖沙咀港鐵站、尖東港鐵站、五支棋杆巴士總站或尖沙咀天星碼頭都係咫尺之間。如果帶小朋友嚟嘅，不妨去埋附近嘅香港藝術館、太空館同星光大道參觀，咁呢兩日一夜Staycation行程就夠晒豐富啦！半島酒店主樓喺1928年開幕，當時只有7層高，被古物古蹟辦事處評定為一級歷史建築。直至1994年加建30層高嘅新館，成為依家嘅外觀，共提供300間客房同套房。雖然酒店歷史悠久，但因為經過多次維修裝修，所以保養得非常好，完全無殘舊嘅感覺，更曾被評選為全球十大最佳酒店。至於半島酒店嘅大堂就保留住古典嘅維多利及巴洛克復興風格，充滿英倫優雅味，絕對係半島酒店嘅必到打卡熱點。
至於喺半島酒店嘅大堂外面，除咗噴水池之外，亦有14架勞斯萊斯，係全球擁有最多勞斯萊斯車隊嘅酒店！
房間區域
我哋今次入住嘅房間係豪華客房，作為第一次入住半島酒店，A姐一直希望入住主樓，感受半島酒店嘅歷史典雅，終於一如所願（其實大部份人都鍾意住新館多啲架，所以呢個願望其實唔難達成）。另外，入住半島酒店主樓嘅樓層就肯定會較矮，視野就肯定會有阻擋。我哋今次入住嘅係3樓，景觀以太空館、文化中心為主，當然仲有少少被太空館遮住嘅維港景啦！雖然景觀有少少遮檔，但房間隔音一流，完全唔會聽到馬路上嘅行車聲音。
一入房間嘅玄關位就係大大個衣櫃，衣櫃內放有拖鞋、浴袍同雨傘等用具。另外，房間多個位置都放有平板電子螢幕，可以調教燈光、窗簾、請勿打擾及清潔房間等智能控制，位於床邊嘅平板更同時係電視遙控，可以隨意轉台；平板更可以聯略酒店職員、order in-room dining同訂購半島紀念品等服務。
房間面積非常大，加上半島酒店主樓屬於舊式嘅間隔，所以樓底非常高，空間感十足！房間分為兩部份，一邊係客廳，一邊係睡床。睡床係King size雙人床，配上2個較軟同2個較挺嘅枕頭，床嘅兩邊都有床頭櫃，放電話同眼鏡都非常方便！至於窗簾遮光度十足，瞓到自然醒再落去食早餐，真係好爽呀！
至於客廳位置就有一張梳化同茶几，喺我哋入房前，已預先放有生果同紀念日朱古力，好細心好驚喜呀！而客廳位置當然仲有一部大電視，頻道選擇非常多，仲可以連接電話睇youtube架！
另外，喺窗邊亦有書枱、梳妝枱同mini bar。
書枱：半島酒店提供嘅文書用品齊全，大家甚至可以攞走書枱上嘅post card，將半島入住嘅經驗寄俾朋友呀！
梳妝枱：點解無鏡嘅？原來想要照鏡就要按下按鈕，照到A姐靚靚嘅鏡就會出嚟喇！另外，喺櫃桶亦放有風筒同乾指甲機。無錯！係乾指甲機，絕對係我第一次見到酒店會提供嘅電器，可惜A姐無帶指甲油嚟，所以得物無所用喇！
Mini Bar：放有兩支免費嘅evian飲用水、茶包同capsule 咖啡包，至於其他嘅小食、酒同飲品都會額外收費。只外，酒店嘅熱水壺係即熱水機，想淥杯麵、沖茶都唔洗等水滾啦！
浴室區域
浴室乾濕分離，其中一間細啲嘅房係如廁區，入面有馬桶同小型洗手盤，但我哋就略嫌馬桶較細較矮，好似幼稚園或小學嘅馬桶，坐得好唔舒服。至於大啲嘅一間就有浴缸、淋浴區同大型洗手盤，整個浴室嘅樓底非常高，加上全部用上雲石，非常有氣派！至於浸浴嘅時候仲可以睇埋電視慢慢嘆呀！至於個人用品方面就只有牙刷、牙膏、浴帽、剃鬚刀等，非常齊全。而洗頭水、沐浴露、護髮素、潤膚露就用自家品牌，邀請本地調香師Angel Cheung調製，將茉莉、沉香、琥珀嘅精油，並加入天然成份製成，特別欣賞酒店採用可回收嘅包裝，除咗味道夠香夠獨特，仲非常環保。
娛樂設施
半島酒店內設有小型商場，商店以高級品牌同鐘錶珠寶為主。至於酒店嘅頂層仲設有香港唯一一間擁有私人直昇機場嘅酒店，如果budget許可，可以參加半島酒店嘅直升機體驗，喺天空中欣賞維港兩岸景色（可惜我哋未有呢個budget喇）。另外，半島酒店亦設有健身室，不過因為限聚令，我哋就無入去玩喇；而重點嘅泳池就可以喺check-in時預約時間，酒店嘅泳池係羅馬式設計嘅室內恆溫泳池，配有2個按摩池，雖然打卡確實好靚，但我哋就略嫌按摩池啲水力麻麻，而且水溫略凍。
餐飲服務
酒店設有9間餐廳、酒吧及咖啡店，至於我哋今次嘅staycation就包咗喺打卡熱點嘅大堂茶座食早餐。
詳情：相當享受的Staycation早餐 半島酒店大堂茶座
世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–
香港半島酒店 The Peninsula Hong Kong
地址：九龍尖沙咀梳士巴利道
預訂網址：www.klook.com
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
