[香港Staycation] 浪漫度假首選 香港迪士尼樂園酒店
要數全世界最浪漫嘅地方，又點少得迪士尼呢？所以喺今年情人節兼我哋嘅7週年紀念日就嚟到香港迪士尼樂園酒店玩Staycation慶祝啦！香港迪士尼樂園酒店以維多利亞式建築設計，讓我哋有一種喺城堡居住嘅感覺。酒店仲有唔同嘅設施、活動同興趣班，所以入住香港迪士尼樂園酒店真係完全唔會悶架！
預訂網址：www.kkday.com
泊車收費
酒店住客泊車收費係$190，可以由check-in泊到第二日嘅23:59，收費期內可以隨意喺香港迪士尼樂園酒店、迪士尼探索家度假酒店、迪士尼樂園停車場泊車，但要留意迪欣湖停車場係不包括在內嘅。如果係選擇公共交通工具嘅朋友就可以乘坐迪士尼樂園度假區嘅穿梭巴士往返酒店同港鐵迪士尼站。
酒店大堂
香港迪士尼樂園酒店喺2005年9月12日同香港迪士尼樂園一同開幕，雖然已經有17年歷史，但酒店嘅保養非常好，完全睇唔到歲月嘅痕跡。至於香港迪士尼樂園酒店以迪士尼浪漫及夢幻為主題，所以一入到門口，就有米奇老鼠同米妮老鼠嘅雕像迎接大家。至於雕像後邊嘅中庭位置，樓底極高，面向酒店嘅花園同無敵海景，不定時仲會有駐場樂隊演奏，真係好似去咗王子同公主開舞會嘅地方呀！
香港迪士尼樂園酒店總共提供400間客房，除咗一般嘅客房，仲有以唔同公主為主題嘅客房 ，其中《魔雪奇緣》客房就最受小朋友歡迎喇！香港迪士尼樂園酒店嘅check-in大堂位於3樓，整間酒店面積非常大，所以check-in嘅時候，職員都會好細心講解路線同各項活動嘅安排。
房間區域
香港迪士尼樂園酒店樓高七層，而我哋入住房間位於6樓嘅海景露台客房，喺露台除咗睇到位於內園嘅迷宮，仲睇到迪士尼碼頭，同遠眺中環嘅無敵海景，整體景色非常開陽。香港迪士尼樂園各間酒店都以家庭客為主，所以空間感十足，而睡床則為兩張Queen Size大床，床框有唔同嘅迪士尼朋友圖案。至於床單柔軟，配上2個較軟同2個較挺嘅枕頭，窗簾遮光度十足，第二朝可以瞓到自然醒啦！
另外，房間嘅衣櫃內分別放有大人同小朋友嘅浴袍同拖鞋。房間內亦有電熱水煲、2大支支裝水、免費嘅茶包同咖啡包，如果需要mini bar其他飲品，呢度亦有package，夠晒抵！另外，由於房間以家庭客為重心，所以水杯都有4隻，仲有兒童特設嘅水杯，超得意架！
作為一間親子嘅酒店，房間內嘅電視頻道，除咗本地同海外嘅電視台之外，仲有2個迪士尼頻道，全天候播放迪士尼動畫，最正係用廣東話配音架（當然亦可選擇英語或國語配音）！另外，房間唔同位置都有插頭同USB插頭，床邊更附設充電線，非常方便。
浴室區域
浴室乾濕分離，仲有一個浴缸添！淋浴區內放有洗頭水、沐浴露同護髮素，品牌為H2O+。至於其他個人用品就以7個小矮人為主題，包括番梘、牙膏、牙刷，小朋友專用嘅米奇、米妮牙刷、浴帽、剃鬚刀等等。另外，淋浴區內雖然已放有洗頭水、沐浴露同護髮素，但呢度亦放有俾你帶走嘅米奇頭洗頭水、沐浴露同護髮素，真係好靚呀！
娛樂設施
香港迪士尼樂園酒店嘅設施非常多，住客仲可以同時使用其他迪士尼酒店嘅設施同活動（泳池除外）。設施包括健身室、網球場、迷你高爾夫球場、羽毛球場等。另外，香港迪士尼樂園酒店設有全年開放嘅室內泳池，至於室外泳池就有一條長40米嘅滑梯，非常適合小朋友放電呀！
米奇迷宮
喺香港迪士尼樂園酒店嘅花園，就有一個以米奇為設計靈感嘅英式花園迷宮，對於小朋友嚟講，難度都幾高㗎！
童話天地
喺泳池旁邊，就有一個室外嘅兒童遊樂場。至於室內就有童話天地。入面有滑梯、電影放映會同幼兒玩具等設施，仲會不定時舉行活動添。我哋入住期間就參加咗迪士尼氣球創作班同手工藝創作班啊！
康樂部
Check-in嘅時候，酒店職員提供咗一張時間表，有唔少活動都喺康樂部報名，例如尋找隱藏米奇嘅定向活動、迪欣湖自然之旅、迪士尼魔法宮殿之旅等等。仲可以喺呢度租用瑜伽套裝或唔同嘅board game遊戲。呢度亦有提供各項收費活動，如果有興趣都可以去報名呀！
迪士尼朋友會面
作為迪士尼嘅酒店，當然唔少得同迪士尼朋友影相打卡啦！不過喺疫情期間，迪士尼朋友就無喺大堂出現，大家需要預約，再喺指定時間嚟到會議中心同佢地見面打卡。
皇庭禮品店
喺香港迪士尼樂園酒店嘅大堂設有迪士尼小影院播放迪士尼節目，但因為房嘅電視都有得睇，所以啲放映中心係完全無人嘅。至於全間酒店開放時間最夜嘅就係皇庭禮品店，雖然貨品種類一定比迪士尼樂園少，但A姐都已經買到唔少心頭好喇！
迪士尼朋友太極班
第二朝起身，就一定唔可以錯過迪士尼朋友太極班呀！今日就邀請到米奇老鼠教我哋耍太極，雖然只係短短15分鐘，但體驗確實唔錯！不過，由於名額有限，先到先得呀！
餐飲服務
酒店設有四間餐廳，分別係提供中餐嘅晶荷軒、主打自助餐嘅翠樂庭餐廳、海風吧同華特餐廳。
係入住期間，我哋就去咗翠樂庭食自助午餐。
詳情：主題樂園豐富自助午餐 迪士尼酒店翠樂庭餐廳
至於喺晚市暫停堂食期間，除咗可以order Room Service之外，各間餐廳亦提供外賣服務。我哋就喺晶荷軒叫咗二人餐。套餐包括一人一份嘅前菜、例湯、小炒、炒飯同甜品，味道不過不失啦，特別一讚係佢嘅炒飯夠晒鑊氣，分量十足！
世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–
香港迪士尼樂園酒店 Hong Kong Disneyland Hotel
地址：香港迪士尼樂園度假區
預訂網址：www.kkday.com
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
