【台北Omakase推介】高質抵食台北曹料理，廚師發辦低至HK$140！

去台灣旅行，就梗係要食啦！除咗去夜市掃街、食地道傳統嘅台灣菜、麻辣火鍋之外，有無諗過喺台灣食日本菜呢？嚟到台北近101嘅曹料理，餐廳主打Omakase，由廚師按照當日食材，為大家嘅味蕾帶嚟最新鮮嘅衝擊，而重點係價錢超平，人頭低至新台幣$580（折算約為HK$140），但出品一啲都唔馬虎，高質又抵食。

台北Omakase：曹料理 | 價錢收費
曹料理嘅Omakase（廚師發辦）分為5個等級，由價錢最平嘅榮（新台幣$580 – 約HK$140）、萬（新台幣$1,080 – 約HK$260）、妹（新台幣$1,580 – 約HK$390）、成（新台幣$2,080 – 約HK$500）、至最貴嘅曹傳（新台幣$2,580 – 約HK$630），餐廳嘅性價比超高，人氣極高，加上餐廳座位唔多，所以想食就要提前上網訂位呀！至於食材及份量按照價錢而定，而我哋今次就揀咗「萬」，合共8品嘅Omakase（廚師發辦）。

台北Omakase：曹料理 | 鮑魚帆立貝沙律
估唔到呢個價位嘅前菜都有原隻鮑魚同帆立貝，可想而知呢個Omakase（廚師發辦）一啲都唔簡單啦！鮑魚同帆立貝都係熟食，廚師用最簡單嘅調味，味道雖淡，但更能食到鮑魚同帆立貝嘅鮮甜味，兩款食材嘅口感都非常彈牙，好驚喜呀！

台北Omakase：曹料理 | 帆立貝茶碗蒸
食Omakase（廚師發辦）通常都係由清淡口味，讓口腔及味蕾步步遞進，所以第二道菜，廚師就帶嚟茶碗蒸。茶碗蒸上面有大大隻帆立貝，同樣鮮甜彈牙，但重點係用上海鮮湯調味嘅蒸蛋，真係又香又滑，入面仲有絲絲嘅蟹肉，非常清新！

台北Omakase：曹料理 | 八品刺身
Omakase（廚師發辦）又點少得刺身呢？雖然同一般Omakase（廚師發辦）唔同，曹料理一次過上齊多款刺身，而唔係逐樣逐樣上，但刺身擺盤都幾靚，共有8款食材，包括拖羅、鯛魚、刀貝等，每款都離不開新鮮，而我就特別喜歡三文魚同刺蝦。

台北Omakase：曹料理 | 蜆湯
進入熟食前，廚師送上一碗熱湯。本為以為係平平無奇嘅麵豉湯，但入面原來勁多蜆肉，蜆肉粒粒飽滿，更令湯底提鮮。

台北Omakase：曹料理 | 海鮮三品
話明高質又抵食，海鮮又點會只得刺身呢？呢個海鮮三品有龍蝦、大蝦同瀨尿蝦。三款海鮮都係熟食，蝦肉新鮮鮮甜，龍蝦雖然唔算好大隻，但蝦頭勁多膏，好鮮甜呢！

台北Omakase：曹料理 | 汁煮牛舌
清淡過後，終於嚟啲濃郁嘅味道。呢個汁煮牛舌勁入味，牛舌大大粒，但又一啲都唔韌，肉質軟腍，好好味。

台北Omakase：曹料理 | 魚生飯
平時食Omakase（廚師發辦），唔少餐廳只係整個三文魚炒飯、鰻魚炒飯，但估唔到曹料理係以魚生飯作為呢個Omakase（廚師發辦）嘅殿粉質主食呢！呢個魚生飯有大大條星鰻、玉子、三文魚籽同角切魚生，海鮮比例超多。新鮮爽脆嘅三文魚籽，配上軟綿嘅星鰻，絕對係顛覆口感！

台北Omakase：曹料理 | 紅豆乳治甜品
不知不覺嚟到曹料理Omakase（廚師發辦）嘅尾聲，廚師以紅豆乳治甜品作結。漲卜卜嘅紅豆配上煉奶，味道唔會太甜，為呢次嘅Omakase（廚師發辦）作完美嘅句號。

曹料理
地址：110台灣台北市信義區基隆路二段39巷16號
電話：+886 983 936 644
營業時間：星期一至日 11:30–14:00、17:30–21:30
網上訂位：https://inline.app/booking

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com