[香港Staycation] 站在全港最高的國度 香港麗思卡爾頓酒店

因為疫情，究竟有幾耐無去過旅行？又究竟有幾耐無放過假？疫情仍然肆弱，我哋當然唔可以鬆懈，但不知不覺疫情已成為生活嘅一部份，喺返工嘅同時，都要為生活加一點色彩！近期各大港酒店都推出Staycation優惠，價錢非常吸引，部份3星酒店更低見HK$300，但我哋覺得要住當然要住5星啦，因為房價嘅跌幅較大，以前要HK$3,000-4,000，依家HK$1500左右就有得歎番晚！所以今個星期嘅Happy Weekend，我同A姐就去咗住番晚香港麗思卡爾頓酒店 The Ritz-Carlton Hong Kong！

預訂網址：hk.trip.com

The Ritz-Carlton Hong Kong 位於環球貿易廣場ICC，樓下就係圓方 Elements，加上係港鐵東涌線、港鐵西鐵線/屯馬線、機場快線、高鐵嘅交匯站，買嘢、食嘢同四圍去都好方便。酒店喺環球貿易廣場嘅103至118層，而喺2011至2019年更成為全球最高嘅酒店添！

酒店大堂
如果入住check-in，就要先坐電梯去到位於103樓嘅lobby喇！可能近期推出好多優惠，所以check-in時間比較耐，但員工仍然保持住專業嘅笑容。

客房區域
由於Ritz-Carlton座擁高層嘅優勢，所以所有客房嘅景觀都好開揚，唔同客房因應方位睇到唔同嘅風景，部分客房係海景房，可以一望無際欣賞到維港兩岸景色；相反，其他客房就睇到九龍半島同獅子山等城市同山景。天氣好嘅時候，甚至可以遠眺北角同九龍灣等地區。

我哋今次入住Deluxe Victoria Harbour, Guest Room, 1 King（Victoria Harbour view and Skyline view）。入到房間，先經過長走廊同睡眠區，就可以望到窗外嘅風景。我哋嘅房間正正望住中環國際金融中心、太平山、西區，甚至迪士尼至愉景灣一帶嘅景色。對住呢個景，真係同A姐嘩……嘩……嘩咗好多聲。另外，由於Ritz-Carlton位處高層嘅優勢，所以私隱度極高，真係好有私人空間。

張床係King size，大小適中，但如果一家4口嚟住就應該會迫啲喇。不過床褥軟硬度適中，而且床單同被鋪都好滑好舒服，加上隔音一流，真係好容易就可以入睡。

Ritz-Carlton亦深得商務旅客喜愛，所以工作空間都唔少，大大張嘅書枱，基本文具都非常齊全。配合埋呢個靚景，做嘢嘅頭腦一定好清晰。

我哋間房有2個大衣櫃，保險箱、拖鞋、熨斗、浴袍都收得整整齊齊。而房間內嘅mini bar ，有免費嘅咖啡capsule同茶包，仲有零食、汽水同酒等等嘅收費項目。而電視頻道選擇相當多，好多外國嘅頻道亦有提供。

浴室區域
浴室超級大，第一眼一定俾佢個浴缸所吸引，而且浸浴用品相當齊全，仲可以邊浸浴邊睇電視添。另一邊有仲有花灑區同如廁區，當然係乾濕分明，而且設有雙洗手台，各項日用品都有，用上Asprey品牌，夠晒貼心。但A姐就話略嫌太多鏡，夜晚去洗手間會有啲驚。

健身及泳池
呢度嘅健身室同泳池位於118樓，係全世界最高嘅室內泳池。室內部份設有無邊際嘅長方型泳池，另有2個水療池。至於室外部份亦設有1個水療池，同曬太陽區域。

而健身室嘅設施相當齊全，用嘅人唔多，喺高空可以慢慢享受運動嘅樂趣。

餐飲服務
我哋無喺酒店用餐，但其實呢度有6間餐廳選擇，其中包括：Cafe 103、天龍軒、OZONE@118F等。

而酒店亦設有Spa同行政酒廊。

世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–

香港麗思卡爾頓酒店 The Ritz-Carlton Hong Kong
地址：九龍柯士甸道西1號環球貿易廣場
預訂網址：hk.trip.com

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com