[香港Staycation] 抵玩泡泡浴套房之選 銅鑼灣愛麗舍酒店

根據A姐M佬嘅非官方統計，大家去玩Staycation嘅三大要求，一定唔少得喺浴缸浸泡泡浴！如果想浸浴兼要靚景打卡，但budget又唔太多嘅話，銅鑼灣愛麗舍酒店嘅行政套房，絕對係我哋嘅心水推介之一！另外，酒店亦有提供月租優惠客房，租期比租樓更有彈性，深受追求私人空間或者喺附近返工嘅朋友喜愛。

預訂網址：www.trip.com

酒店大堂
銅鑼灣愛麗舍酒店位於銅鑼灣摩頓臺，大概行3分鐘，就可以去到最就近嘅維多利亞公園電車站，玩Staycation嘅同時，不如嚟個慢活嘅電車之旅啦！另外，大約10分鐘嘅步程就可以去到銅鑼灣港鐵站，而銅鑼灣區當然唔少得各大商埸、日式百貨公司同24小時日式人氣超市啦，想行街買嘢同補給日用品都夠晒方便！而我哋就特別欣賞酒店自家製作嘅觀光地圖，非常適合大家扮吓遊客，遊玩香港。

愛麗舍酒店嘅check-in counter位於地下，雖然大堂設計簡約，但check-in過程非常順暢，員工服務一流，勁快手就攞到匙卡上房喇！由酒店搭lift上房或者凌晨12點後返酒店都要拍卡，保安都算唔錯。

房間區域
愛麗舍酒店一共提供92間客房及套房，以樓層同景觀分為唔同房型，以及頂層設有浴缸嘅行政套房。由於酒店嘅客房都只係HK$350左右一晚，所以M佬今次話住豪啲，入住28樓頂層，最高級嘅行政套房，等我哋可以浸吓浴，relax吓。

行政套房嘅面積空間感唔錯，景觀以大坑、維園同維港東岸為主，加上今日天氣唔錯，可以睇到獅子山一帶嘅景色，窗外風景夠晒開揚。

雙人床屬於King size，軟硬度適中，床單非常柔軟，枕頭總共有4個，床嘅兩邊都有床頭櫃，亦有插頭位方便充電。但略嫌房間嘅窗簾遮光麻麻，喺啲罅隙會有光透入，所以易扎醒嘅我，朝早就比較早起身喇！

另外，房間當然唔少得風筒、衣櫃、保險箱、拖鞋同浴袍。另外，房間內嘅mini bar就有水煲、免費嘅茶包、咖啡包同雪櫃，基本嘢都算齊晒。

最令我哋欣賞嘅係電視頻道選擇超多，除咗本地免費電視台，連平時收費嘅英超台、體育台、電影台同台灣電視台都有，真係足不出戶都有勁多節目選擇。

浴室區域
講到成間房最值回票價，當然就係浴室內嘅浴缸。我哋特意選購採用天然材料，不含SLS致敏成份嘅bulu.bathbomb泡泡浴球，勁容易就打出泡泡沉呀！浴室景觀同樣以大坑、維園同維港東岸為主，輕鬆就製造成打卡泡泡浴啦！浴室乾濕分離，除咗浴缸仲有淋浴企缸。至於個人用品除咗牙刷、牙膏，仲有自家品牌嘅沐浴露，味道都幾香，如果有需要就自行攜帶啦！

娛樂設施
愛麗舍酒店亦設有一個gym corner，設有跑步機、單車機同啞鈴，雖然設備唔多，但足夠減肥，而且月租嘅朋友連去健身室嘅錢都可以慳番啦！另外，健身室旁邊就係洗衣房，作為月租嘅朋友仔，洗衫一定係最重要嘅一環，所以酒店喺呢度亦設有多部洗衣機同乾衣機，大家可以自行使用。

餐飲服務
酒店現時嘅餐廳正進行裝修，預計2021年年底開放。但其實由酒店行去大坑亦只係10分鐘左右步程，一齊發掘大坑嘅美食啦！

其他房型
愛麗舍酒店以樓層同景觀分為唔同房型，房間面積唔大，但基本設施齊全，亦有大床同雙床選擇。酒店另提供月租住宿優惠，由於租期比租樓更有彈性，有唔少追求私人空間、屋企裝修或者喺附近返工嘅朋友喜愛。

世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–

銅鑼灣愛麗舍酒店 Elysion Place Hotel Causeway Bay
地址：銅鑼灣摩頓臺7號
預訂網址：www.trip.com

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com