[香港Staycation] 酒店尊享貴賓室 尖沙咀帝苑酒店

唔知你哋住酒店玩Staycation有咩要求呢？浴缸？泳池？海景？定係好似我哋咁，鍾意包埋全日貴賓酒廊嘅Staycation呢？尖東麼地道係其中一個大家玩Staycation嘅熱門區域，今次我哋就嚟到價錢唔貴嘅傳統五星級酒店：帝苑酒店。帝苑酒店最出名嘅當然係香港少見嘅中空設計，觀光電梯非常適合大家打卡架！

酒店大堂
酒店位於尖東，距離紅磡站或尖東站約10分鐘步程，交通非常方便；而酒店附近亦有超級市場，同勁多餐廳選擇。如果帶小朋友嚟嘅，不妨順便去埋附近嘅香港歷史博物館同科學館參觀，咁呢兩日一夜staycation就夠晒行程豐富啦！

酒店喺1981年開幕，期間曾多次進過翻新工程。而帝苑酒店嘅酒店大堂位於1樓，大堂樓底唔高，亦未見有任何特色，只能夠講係非常普通。但check-in完之後，就可以乘坐觀光電梯直上房間樓層，呢部觀光電梯可以睇到帝苑酒店最出名嘅中空設計大樓，非常吸引。至於，我哋今次入住尊貴客房，可以直接前往Crown Club享用特快登記入住服務，避開1樓check-in嘅人潮。

值得一讚嘅係呢度嘅員工非常專業，講解同每項安排都解釋詳盡。但大家入住前請留意，如果你係追求浴缸嘅，就建議提前有禮貌同酒店提出（當然提出都唔代表一定能夠安排架），因為浴缸嘅房間數量確實唔多。以我哋check-in嘅經驗分享，酒店職員主動upgrade我哋去海景房間，但就表示房間未有浴缸，所以我哋最終都選擇只有樓景嘅浴缸房間。

房間區域
帝苑酒店總共有450間客房同套房，我哋今次就入住位於11樓嘅城市景觀行政尊貴客房，房間面積為300平方呎，空間感十足。雙人床屬於King size，床褥軟硬適中，非常舒服；枕頭總共有4個，2個係軟2個係硬。窗簾遮光一流，加上房間隔音唔錯，所以我哋嘅睡眠質素一流。兩邊嘅床頭都有床頭櫃，一邊有藍牙喇叭，而另一邊就有叉電線，所以就算唔記得帶充電線都夠晒方便。另外，房間亦設有多個充電位及USB充電位，整體嚟講，充電係夠晒方便。至於房間嘅電視機為40吋LED高清電視，提供37個免費頻道，可以同M佬攤喺度慢慢煲劇啦！

房間亦有書枱同小客廳位置，酒店亦設有雪櫃、電熱水壺同五星收費嘅mini bar。另外，仲提供兩支免費嘅蒸餾水、茶包同咖啡包。至於package亦包括2個蘋果作為迎賓水果。至於景觀方面，正如我哋之前所講，我哋放棄咗海景，所以景觀就以旁邊嘅大廈同酒店為主，視野麻麻。

浴室區域
我哋放棄咗海景，為的就係浴缸！浴室乾濕分離，空間十足，浴缸都唔細。至於個人用品方面就有牙刷、牙膏、浴帽、剃鬚刀等等，用品都算非常齊全。至於洗頭水、沐浴露同護髮素就採用美國嘅Fraîche品牌。另外，亦有提供拖鞋、體重磅、風筒、夾萬同收費嘅洗衫服務。

娛樂設施
帝苑酒店內設有小型商場，不過舖頭唔多，而且唔係太適合我哋行。而健身室設施尚算齊全，設有跑步機、單車機、啞鈴等等。酒店天台嘅Sky Pool以地中海為設計，不過，因為入住當日非常多人，要預早最少30分鐘去排隊，所以我哋就未有使用喇。

餐飲服務
酒店設有8間餐廳及餅店，我哋今次嘅staycation就包咗自助早餐同行政酒廊服務。

Crown Club
Crown Club位於酒店12樓，每日提供免費嘅早餐、下午茶同Happy Hour餐飲服務。但值得大家留意嘅係，呢度並唔係自助任食型式，只會按人數提供相應食物，至於飲品就自取（酒類飲品只會喺Happy Hour時段由店員提供）。講真呢度嘅嘢食味道就麻麻哋，下午茶嘅tea set主要都係烘焙食物，例如蛋糕、三文治、牛角包等等，勝在擺盤幾靚，可以打卡；至於Happy Hour同樣以set嘅型式提供，份量唔多，而且所有食物都唔夠熱，所以如果諗住喺貴賓室食飽就會有啲難度，另外，Happy Hour所提供嘅酒主要為紅酒、白酒同有汽酒。

雅苑座
早餐就位於3樓，正正就係中空設計嘅位置。自取食物區嘅選擇唔算太多，熱食方面有香腸、火腿、薯餅、茄汁豆，可以自製All Day Breakfast；中式選擇就有完全無味嘅雞粥、叉燒包、燒賣。另外，仲有水果、多士、牛角包、沙律、乳酪。另外，仲有egg station、沙律吧等。飲品方面，可以自製凍檸茶、果汁、奶茶同咖啡。

世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–

帝苑酒店 The Royal Garden
地址：香港九龍尖沙咀東部麽地道69號

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com