海牙莫瑞泰斯皇家美術館Mauritshuis：7大必睇作品、門票優惠及交通攻略
要數全球最多人認識嘅女人，除咗《蒙娜麗莎》之外，又點少得《戴珍珠耳環的少女》呢？如果你都想親眼一睹《戴珍珠耳環的少女》的名作，可以去位於荷蘭海牙嘅莫瑞泰斯皇家美術館（Mauritshuis），感受其永恆之美！本文將介紹莫瑞泰斯皇家美術館（Mauritshuis）7大必睇作品、門票優惠及交通攻略，讓你更能走進藝術，認識大師級的作品。
莫瑞泰斯皇家美術館（Mauritshuis）
莫瑞泰斯皇家美術館 | 基本資料
去荷蘭旅行，除咗睇風車之外，當然唔少得去博物館啦！荷蘭有唔少大師級畫家，梵谷、林布蘭、維梅爾等，所以荷蘭美術館特別多，每一間都有唔同主題，甚至鎮館之寶。其中位於海牙的莫瑞泰斯皇家美術館（Mauritshuis）係最受歡迎的荷蘭博物館之一，除咗《戴珍珠耳環的少女》同唔少經典作品之外，就連建築物本身都極具意義！博物館前身為荷蘭文藝複興時期嘅豪宅，極具荷蘭古典主義色彩，更成為世界建築史上重要作品之一。
開放時間：星期一 13:00–18:00、星期二至日 10:00–18:00
地址：Plein 29, 2511 CS Den Haag, Netherlands
建議參觀時間：90–120分鐘
莫瑞泰斯皇家美術館 | 門票優惠
莫瑞泰斯皇家美術館（Mauritshuis）係荷蘭三大美術館之一，所以建議預先購買門票，更能方便入場。
莫瑞泰斯皇家美術館 | 前往方法
由香港去海牙未有提供直航航班，可以先從香港飛阿姆斯特丹，再轉乘當地火車，由阿姆斯特丹前往海牙，車程約為30分鐘。
到達海牙中央火車站後，步行10分鐘即可到達莫瑞泰斯皇家美術館（Mauritshuis）。
莫瑞泰斯皇家美術館 | 7 大必睇作品
尼古拉斯．杜爾博士的解剖學課（De Anatomische les van Dr Nicolaes Tulp）
《尼古拉斯．杜爾博士的解剖學課》係荷蘭畫家林布蘭（Rembrandt van Rijn）喺1632年嘅作品，展示一班醫生圍住杜爾博士做嘅解剖示範，每個人嘅姿勢、眼神、角度都唔同，好似捕捉咗一個正在發生嘅瞬間，畫得好真實，完全唔死板，成為莫瑞泰斯皇家美術館必睇作品之一。
兩位非洲男子（Twee Afrikaanse mannen）
同樣為荷蘭畫家林布蘭（Rembrandt van Rijn）的作品：《兩位非洲男子》。喺1661年嘅時候，非洲人多數只會以配角、僕人等角色出現於畫作，但呢幅作品，卻將兩位非洲男子成為主角，加上無華麗背景亦無任何誇張動作，而畫家僅以一明一暗調色，突顯皮膚質感、輪廓同眼神表情，成為莫瑞泰斯皇家美術館唔顯眼，卻是難忘的作品。
芝士靜物畫（Still Life with Cheeses）
《芝士靜物畫》係當年少數由職業女畫家創作嘅畫作，畫家克拉拉．彼得斯（Clara Peeters）將典型嘅荷蘭生活描繪出嚟，由一張木枱、芝士、餅乾、麵包等日常餐桌，看似簡單，但細心一看，就會見到芝士表面嘅裂紋、切口嘅質感、甚至微微泛油，成為莫瑞泰斯皇家美術館極為細緻的作品。
吃蠔的少女（La Ragazza che Mangia Ostriche）
由荷蘭畫家揚．斯特恩 (Jan Steen) 創作的《吃蠔的少女》同《芝士靜物畫》一樣，看似生活日常，畫中少女坐喺枱邊，手拎蠔殼，將食物同質感畫到好真實。但其實生蠔象徵享樂、慾望同感官刺激，以當時保守嘅思想，其實卻隱藏住曖昧，成為莫瑞泰斯皇家美術館最想入非非的作品。
拿著蠟燭的老人與孩子（Vecchia e bambino con candela）
呢幅《拿著蠟燭的老人與孩子》可以話係整個莫瑞泰斯皇家美術館內，令我哋最讚歎嘅作品。首先一支蠟燭照亮一位年老婦人同一個小孩，而佢嘅光暗做得非常迫真，光線柔柔地掃過皺紋、皮膚同眼神，令你能夠感受到老人嘅神情安靜又帶點疲憊，非常細緻。
小金翅雀（Het Puttertje）
《小金翅雀》係卡雷爾．法布里蒂烏斯（Carel Fabritius）嘅作品，背景幾乎留白，刻意令你嘅注意力全集中喺金翅雀身上。畫家將羽毛嘅質感畫到超真，啡黃相間、光影細膩，甚至連牆身嘅灰白都帶住溫度；但最有張力嘅，其實係金翅雀代表生命同自由，卻被鐵鏈無情嘅束縛同枷鎖，係莫瑞泰斯皇家美術館內最有深層意義嘅作品。
戴珍珠耳環的少女（Meisje met de parel）
講到莫瑞泰斯皇家美術館最經典嘅收藏，當然就係維梅爾（Johannes Vermeer）嘅《戴珍珠耳環的少女》啦！呢個少女無名無姓，但卻被譽為全球繼《蒙娜麗莎》之外，最多人認識嘅女人，當然唔簡單。畫中少女戴住藍黃色頭巾，珍珠耳環閃閃發光，神情真緻，回頭一望，嘴唇微微張開，成為一個經典。
更多旅遊優惠
世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–
常見問題
莫瑞泰斯皇家美術館最出名嘅作品係咩？
一定係 《戴珍珠耳環的少女》。幾乎所有人入場第一個目標都係佢。另外仲有林布蘭嘅《杜爾博士的解剖學課》、卡雷爾・法布里蒂烏斯嘅《小金翅雀》，全部都係教科書級名作。
需唔需要提前買莫瑞泰斯皇家美術館入場門飛？
建議提前網上買飛，特別係假日同旅遊旺季。
莫瑞泰斯皇家美術館內可以影相嗎？
可以影相，但唔可以用閃光燈，亦唔可以用腳架。
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
