屯門打卡郊遊好去處 必影彩虹欄杆同藍地水塘

自從當年同A姐行過一次鳳凰山之後，佢對郊遊有咗新定義：就係一定要行得輕鬆、有得打卡同埋交通方便。要達成呢三個要求其實一啲都唔難，今日我哋就嚟到屯門徑，沿路輕鬆唔難行；而且起點同終點都鄰近輕鐵站或西鐵站，行完醫肚無難度；更重要係有屯門區全景、彩虹欄杆同藍地水塘打卡。絕對適合大家Weekend輕鬆走一回。

提提你
1. 由中華基督教會何福堂書院起步至福亨村籃球場為終點，全程約2小時，沿途有上有落，整體唔算難行，但都要量力以為
2. 沿路不設小食亭同洗手間，大家記住自備所需用品
3. 大家記住保持環境清潔，自己垃圾自己帶走，絕對唔可以破壞大自然環境

前往方法
坐西鐵至屯門站或輕鐵至杯渡站，行5-10分鐘就會去到中華基督教會何福堂書院旁邊山徑起步；終點為福亨村籃球場，行15分鐘至藍地輕鐵站回程。（可以順路去埋妙法寺參觀）

彩虹欄杆
由中華基督教會何福堂書院旁邊嘅山徑起步，頭20-30分鐘都係上山嘅樓梯路線，亦係全段路路中，唯「二」嘅上山路段。不過，中途都有涼亭同長凳俾大家休息，唔算太辛苦。

行完一段樓梯之後，就會嚟到第一個分叉口，選擇左邊往屯門徑方向就啱。再行大約10分鐘樓梯路，又有另一個分叉口，右邊雖然寫往「藍地水塘」，但去彩虹欄杆仍然係靠右行嘅主徑行。之後，大家就會嚟到全長200米嘅彩虹欄杆，欄杆七彩繽紛，非常搶眼。

屯門全景
彩虹欄杆尾段嘅風景，因為無樹遮擋，所以視野一流，屯門東至西都一覽無遺。我哋就見到有唔少人會離開山徑，爬上彩虹欄杆外，無䕶欄嘅大石頭影懸崖相，講真唔算困難，但都要量力而為，而且離開咗山徑，危險自負，小心為上。

藍地水塘
彩虹欄杆嘅盡頭連接木欄杆，行前多5分鐘就會去到分叉口：如果往左行，就係落山到怡樂花園嘅路程；如果住右行，就係往藍地水塘方向行。我哋就選擇右邊繼續行，頭15分鐘就係另一段嘅上山路段，不過，沿途都有樹木遮陰，之後就會開始落山，大約行咗30分鐘，就會聽到流水嘅聲音。經過虎地燒烤場再往下行，就會見到虎地村，旁邊就有一條樓梯，大概5分鐘就會去到藍地灌溉水塘、堤壩係另一個影相打卡熱點。

喺提霸盡頭嘅山上，就有一個標高柱，可以睇到水塘全景（不過，呢條路有少少難度，爬上去一定要小心）。

離開水塘再行大概15分鐘，就會穿過一條村落，經過石礦場去到終點站：福亨村籃球場。

世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–

屯門徑 Tuen Mun Trail

藍地灌溉水塘 Lam Tei Irrigation Reservoir

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com