最怕豬一樣嘅隊友 與A姐大戰喪屍 Playdium VR

A姐：M佬，唔好打機啦！陪我去食飯！

A姐：M佬，唔好打機啦！陪我去街！

A姐：M佬，唔好打機啦！陪我睇戲！

……如是者，到了某一天……

A姐：M佬，快啲食啦！食完去打機！

我有無聽錯呀？A姐竟然話陪我打機？！不過，打機就最怕豬一樣嘅隊友，A姐，你掂唔掂架？

A姐今日就帶我嚟到位於銅鑼灣景隆街嘅Playdium VR，話要同我打VR！

呢間開咗無耐嘅VR體驗店，除咗有傳統嘅射擊遊戲、擂台拳擊，仲有全港獨家嘅捉鬼遊戲！當然唔少得喪屍遊戲啦！由於我哋兩個都係第一次玩，所以店員好落力介紹每一種遊戲特點同安全注意事項，最重要係玩VR真係一個體力勞動嘅活動，隨時玩到身水身汗，所以店內除咗會提供樽裝水，仲會提供面罩，以確保衛生！聽完介紹，即刻試玩！

A姐又要驚又要玩，所以一開始就陪佢玩啲比較cute嘅遊戲，等佢熱吓身先啦！呢個全港獨家嘅捉鬼遊戲，每隻鬼都肥嘟嘟，成粒棉花糖咁！A姐戴住VR眼鏡負責捉鬼，而我就做指揮，提示每隻鬼嘅位置，當鬼太多，我仲可以幫佢冰封住啲鬼！呢個講求合作嘅遊戲，A姐有我呢個神一般嘅隊友，仲唔贏咩？！

唔知大家細個有無睇過《魔神英雄傳》呢？有無諗過坐喺機械人入面，同佢並肩作戰？依家「機會嚟啦，飛雲！」坐上呢個裝置，你就可以同機械人一齊飛天落地，打敗敵人，保衛地球！玩緊嘅時候，仲有風機吹頭，好有真實感架！A姐話成日都要同機械人飛到咁高，好有離心力，好好玩呀！

減肥Boxing：Knockout League VR

唔知你有無啲好乞你憎嘅人呢？同事？上司？或者係你嘅脂肪同拜拜肉？呢個boxing就啱晒你！當你企上去呢個擂台，只要你敢打，你已經嬴咗自己，記住「唔打就唔會輸，要打就一定要嬴」。喺遊戲入面，你嘅對手係一個好大隻嘅黑人拳手。比賽聲一開始，就要左閃右避，再瞄準目標，睇準時機作出攻擊，打咗一場已經全身濕晒，好攰呀！

奔跑吧：OMNI Virtuix

著上特製嘅鞋同衛生襪，企上去呢個圓盤裝置，初初行嘅時候都唔係好習慣，仲要左手拎弓，右手拉箭，同A姐射箭大對決！當你射中目標就要不停向前跑，再到下一個目標繼續射箭，除咗好花力之外，眼界都要好準！A姐，玩咗5分鐘，點解仲喺起點架？

喪叫系列：Arizona Sunshine VR

喺呢個好荒涼嘅地方，人類只得番我同A姐！周圍都係喪屍呀！喺遊戲入面，喪屍會不停進攻，我嘅任務就係防守同保護呢位不停大叫嘅A姐！
M佬：如果我唔好彩俾喪屍咬到，你記住一槍射死我！
A姐：M佬…我唔會揼低你架！
結果，拍住呢個豬一樣嘅A姐，玩咗都無2分鐘，就喺佢嘅尖叫聲下Game Over喇！

其實呢度仲有好多唔同種類嘅VR遊戲，好似獨木橋同12碼咁，不過，今次時間所限，下次再同A姐再嚟大戰喪屍啦！

（記住Like同Share畀朋友）

---

想緊貼A姐M佬嘅吃喝玩樂資訊，快啲Follow埋下面嘅Channel啦！

Facebook：A姐M佬 玩樂日記 
Instagram：AandMdiary
Pinterest：AandMDiary
Openrice：A姐M佬
報料或合作：aandmdiaryhk@gmail.com