沙田十字架打卡朝聖 道風山基督教叢林

趁依家天氣仲未咁熱，一於把握機會，捉A姐行多幾次山啦！香港有唔少嘅山都係佛道二教嘅根據地，例如圓玄學院同寶蓮禪寺等等，但其實喺沙田就有一座基督教嘅名山：道風山！道風山基督教叢林以中國園林為建築特色，園內嘅十字架更加係地標，亦係近期熱門嘅郊遊打卡地點。最重要係一啲都唔難行，大概半個鐘就可以上到道風山，真係瞓到兩點先起步都未遲呀！

提提你
1.道風山基督教叢林屬基督徒靈修之地，遊覽時必須保持安靜
2.道風山內住咗唔少牧師同信徒，無論大家信奉咩宗教，都要帶住尊敬同尊重嘅心遊覽
3.由沙田火車站起步至道風山，路程約半個鐘，全程為水泥路，唔算太辛苦，屬於初級路線，但都要記住要量力以為
4.沿路不設洗手間同補給站，記住自備足夠行裝
5.大家記住保持環境清潔，自己垃圾自己帶走，絕對唔可以破壞大自然環境

前往方法
1.沙田港鐵站落車，喺B出口沿斜路落，行至旁邊嘅排頭村屋樓梯上山，會合道風山路直上
2.道風山設有少量車位，方便自駕人士
3.乘坐的士，直接到達道風山門口

道風山
道風山基督教叢林係二級歷史建築，喺1930年由挪威傳教士艾香德牧師創辦，當時為咗吸引本地華人信奉，所以將大量中國式建築融入園區。命名道風山，道代表「上帝的話」、風就代表「聖靈的能力」、而山就指「修道場所」。

聖殿
以紅木柱、藍色瓦頂同白牆為設計，外型貌似迷你版嘅北京天壇。聖殿最多可容納70人，係道風山崇拜祈禱嘅主禮堂。聖殿外面亦有由上海黃金記冶造嘅大撞鐘，上面刻有榮歸上帝同蓮花十架標誌。

明陣
以大小相約嘅卵形石鋪砌嘅明陣，貌似一個小迷宮，但其實係一個有助於安靜、禱告、靈修、默想同反思嘅安歇處。

生命之門
穿過生命之門，記得回頭睇一睇，因為門嘅另一邊，就係由孫中山先生提字嘅「博愛」！

感恩亭
穿過生命之門，左邊就係感恩亭。喺亭嘅牆上璧畫係一個又一個嘅聖經故事，好似五餅二魚等，但壁畫上嘅人物樣貌同裝扮都係以古代中國人為繪製。

大十字架
高12米嘅十字架上面刻咗「成了」二字，雖然我哋未參透呢兩個字嘅深層意思，但喺十字架旁邊就有一班信徒喺度唱聖詩，我哋望住個十字架配合沙田市景，心靈都覺得非常舒暢。最後，雖然呢個十字架係近期嘅打卡熱點，但大家記住喺呢度影相要尊重自己同尊重宗教。

世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–

道風山基督教叢林 Tao Fong Shan Christian Centre

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com