大坑美食天堂法國餐廳The Pudding Nouveau之鹹食窩夫

（已結業）

一講起去大坑，A姐就懶醒話一定要食肉餅塔，骨膠原拉麵同睇舞火龍。今次唔係食大路嘢，等我M佬帶A姐去威威，食京街裏面嘅小店The Pudding Nouveau。

A姐一見到餐牌，咩都唔理，就話要嗌士多啤梨奶昔。飲落去似沙冰多啲，但真好香士多啤梨味，好足料。

無諗過呢間小店用Mighty Leaf Tea有機茶包，Mighty Leaf Tea係美國加州有機茶葉品牌，之前喺美國試過，都唔錯。我今次叫咗有機熱帶果綠茶，飲落有少少芒果加熱情果嘅甜味，無普通綠茶咁寡。

主菜嚟啦!! 法式油封鴨腿係傳統嘅法國菜，鴨腿肉Juicy兼滑嫩，外面層皮香脆。最特別係上面有隻太陽蛋，連埋啲蛋黃汁同蛋白一齊食，感覺唔同曬，隻鴨腿無咁乾。

平時食鴨腿都唔會配窩夫，問大廚先知，原意係法國鹹食窩夫，可以跟鴨腿一齊食。除咗鹹食，大家可以點黑糖焦糖醬。要我揀，我自己鐘意甜窩夫多啲!

另外，我哋叫咗珍寶龍蝦仔牛角酥配薯條。自家制嘅牛角包好香牛油味，非常鬆化，一咬就勁多包碎飛出嚟。不過嗰小龍蝦沙律餡唔係好夠味，啲小龍蝦係好大舊，不過無咩味，如果多啲沙律醬會好味好多。

A姐一食條薯條就嘩嘩聲，我仲話佢有無咁誇呀。點知自己食都真係嘩咗一聲。啲薯條新鮮炸起，好脆口，但係一定點埋嗰黑松露蛋黃醬。嗰醬有啲黑松露碎，好香黑松露味，令到嗰薯條加曬分!!

下次嚟大坑唔好再淨係食肉餅啦，其實有好多正選擇。

The Pudding Nouveau
地址: 大坑京街17A地下
電話: +852 3585 7325
營業時間: 星期一至五15:00-23:30；星期六至日及公眾假期12:00-23:30

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！