港式晚餐：九龍灣聚點廚房茶餐廳叫餸食飯
（已結業）
M佬話男人嘅晚餐唔食飯好似總係掙咁啲，所以今日一於一切從簡，搵間茶餐廳叫餸食飯啦！
呢間茶餐廳雖然位于工廠區林立嘅九龍灣，但嘅室內設計又幾特別喎，係以懷舊嘅香港做主題，加上坐位寬闊，以格調環境嚟講，相當唔錯！
再睇睇Menu，當然唔少得茶餐廳嘅名物 – 常餐啦！不過都話咗要滿足M佬嘅飯癮，所以今餐就叫齊魚、肉、菜、湯、仲有唔少得嘅飯。
平時著得高踭鞋多，所以頭盤就以型補型，叫咗個泡椒雞腳！但A姐就最怕好油膩嘅雞腳，真係食完補完之後，肥到都著唔落隻高踭鞋！不過，聚點廚房嘅雞腳又唔錯，食落口脆卜卜仲唔溜，真係食多兩隻都No problem！
食完頭盤，又點少得湯呢！例湯？No la！我哋叫咗香茜皮蛋魚片骨湯，上枱一刻真係OMG！啲料多到呢！連個湯都奶白色，飲落口真係不得了，味道又香又濃呢！
話明叫餸食飯，又點少得餸同飯呢？先嚟呢道嘅名物 – 沙薑雞。2個人叫半隻都夠，因為份量都唔少，厚肉得嚟又夠滑，絕對係雞有雞味！當然，沙薑雞嘅spotlight就梗係沙薑啦，夠哂入味。
而另外一個餸就簡簡單單嘅西蘭花炒帶子啦。帶子肉夠厚身，入口又唔韌。都唔錯架！
最後，白飯就唔啱我喇，但又要滿足條佬，所以就叫碟瑤柱蛋白炒飯啦！炒飯呢家嘢，最緊要就係夠鑊氣，夠乾身又足料！
最後，飲埋杯凍檸茶真係飽飽喇！
聚點廚房
地址：九龍灣宏開道19號地下2號舖
營業時間：星期一至六: 07:30-21:00
電話：+852 2798 9923
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
報料或合作：aandmdiaryhk@gmail.com
