激安抵食石燒 中環滿滿食堂

中環食飯俾人嘅感覺就係「貴」，而且食晏時間人多，所以餐廳枱凳逼狹，但今日嚟到中環嘅滿滿食堂食lunch，除咗坐得舒服，仲要係平民價錢，食物質素高，性價比超班，啱晒上班一族嘅你啦！滿滿食堂提供相對平價嘅安格斯到貴價嘅和牛、鮑魚同帶子都有，豐儉由人，甚至連食素嘅朋友都照顧埋，有全素植脂嘅牛扒揀，簡直係照顧周到。

滿滿食堂嘅牛扒同魚嘅份量亦可以自由選擇份量，由最少100g到最多嘅240g，而湯同沙律都係自助式，可以無限添加，無論係雀仔胃定大胃王都啱啦！唔知大家食石板燒，有無試過食到尾嘅時候，塊板已經唔夠熱呢？抵讚嘅係滿滿食堂非常細心，如果食到中段發覺塊石板唔夠熱，可以麻煩店員將石板更換，咁就可以確保所有嘢食熱辣辣啦！

黑蒜油卜卜蜆
黑蒜味好香呀，勁似某一款公仔麵嘅黑蒜油味，令人回味無窮。鍾意食辣嘅朋友仲可以揀泡菜或者冬陰功味添！至於蜆肉大隻清甜，蜆身飽滿，完全無沙，唔會有好多空殼，非常抵食！

石燒雞扒加滿滿紫菜飯
厚切嘅雞扒好吸引呀！因為厚身，所以店員會事先將雞扒略為煎熟，先鎖住肉汁，之後再透過石板燒至全熟，唔洗擔心會唔熟或者要燒好耐嘅問題。食嘅時候，雞扒嫩滑多汁，juicy之餘雞皮仲燒到脆卜卜，充滿口感。

石燒套餐A
套餐A嘅食物有牛肩扒、魷魚、鹹牛脷配滿滿紫菜飯同甜品。牛肩扒生熟度啱啱好，充滿肉汁；魷魚爽口彈牙；鹹牛脷鹹香十足。至於甜品係黑糖布甸，整個石燒套餐份量十足，大胃王都肯定夠曬飽呀！

滿滿食堂 Man Man Canteen
地址：中環皇后大道中58-60號振邦大廈地庫
電話：+852 2653 6678
營業時間：星期一至六 07:30 – 22:00、星期日 11:30 – 22:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com