留住「莓」一刻下午茶 觀塘Angel & Devil
下午茶high tea嘅魔力真係好強，無論咩年紀嘅女孩子都會被佢深深吸引住，所以越賣越貴。其實作為男孩子嘅我覺得食high tea都係想打吓卡，同閨蜜傾吓計姐，所以今日我就帶A姐去到觀塘Club East洞天嘅Angel & Devil。呢度下午茶嘅價錢實惠，賣相精緻，仲有露天平台，絕對可以滿足影靚相嘅願望。至於今期下午茶嘅主題係：『留住「莓」一刻』，主打士多啤梨、紅桑子、黑桑子、藍莓等嘅甜點鹹點！
留住「莓」一刻下午茶
莓含有豐富嘅維他命C、葉酸同花青素，有助抗氧化同抗衰老，而且高纖低脂，酸酸甜甜，而嚟到初秋係莓嘅季節，三層嘅set放有多達二十件精緻以莓入饡嘅鹹甜點，再配上兩杯主題特飲，可以輕鬆享受午後時光！
第一層：藍莓燕窩羅蘭士撻 + 士多啤梨、藜麥沙律鮮蝦杯 + 砵酒啤梨配巴馬火腿
藍莓燕窩羅蘭士撻
呢個Tea set兩位只需HK$268，但用料都矜貴，香脆嘅撻皮入面裝住燕窩，夠晒養顏。
士多啤梨、藜麥沙律鮮蝦杯
杯入面有大大隻新鮮彈牙嘅鮮蝦同藜麥，配上香甜嘅士多啤梨，食落好有口感，開胃又健康。
砵酒啤梨配巴馬火腿
鹹香嘅風乾巴馬火腿，配上清甜多汁嘅啤梨，出奇地咁match。
第二層：香芒煙三文魚慕絲酥皮盒 + 紅桑子英式鬆餅 + 黑桑子配番茄啫喱 + 士多啤梨慕絲配雜莓醬
香芒煙三文魚慕絲酥皮盒
我都鍾意呢個鹹點，煙三文魚同香芒味道好夾，酥皮盒口感豐富。
紅桑子英式鬆餅
外香內軟，出面仲有小紅莓，酸酸甜甜，好好味！
黑桑子配番茄啫喱
酸酸甜甜嘅味道，絕對係我第一次感受嘅啫喱口味，夠晒驚喜又解甜。
士多啤梨慕絲配雜莓醬
英式鬆餅外香內軟，配上廚師秘製嘅雜莓醬，就最適合。
第三層：白朱古力慕絲雜莓蛋糕 + 雜莓美式芝士餅 + 朱古力慕絲餅配燈籠果
白朱古力慕絲雜莓蛋糕
呢個絕對係相機食先嘅甜品！蛋糕以招牌甜品「雨過天晴」嘅雲朵造型登場，香濃嘅白朱古力配上雜莓，唔會太甜。
雜莓美式芝士餅
芝士餅香濃柔滑，好Creamy，同上面嘅雜莓好夾。
朱古力慕絲餅配燈籠果
朱古力味濃厚，慕絲打得細膩香滑，係我最鍾意嘅甜點。
自選飲品兩杯：莓果雞尾酒 + 藍莓香蕉特飲
莓果雞尾酒
飲品有兩款選擇，呢杯雞尾酒以氈酒、甜酒、士多啤梨同檸檬汁調較，下午茶嘅酒味唔會太strong，酸酸甜甜真係happy hour。
藍莓香蕉特飲
想輕盈健康，呢個特飲以藍莓、香蕉、搽茶、雲呢拿同牛奶混合而成，清新健康。
雨過天晴
食緊下午茶嘅時候，見到隔離枱叫咗個好吸引嘅雨過天晴雲朵蛋糕，有埋乾冰，真係好似飛咗上天空咁。呢個雨過天晴雲朵蛋糕嘅Size比下午茶嗰個大，裏面係白桃抹茶，味道清新，仲有生果粒同馬卡龍，好精緻呀！
Angel & Devil
地址：觀塘駿業街58號Club East洞天4樓
電話：+852 3103 3808
營業時間：星期一至日 12:00 – 00:00
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
