銅鑼灣至平任食打邊爐 包羅萬有（萬友）火鍋

「我之前落嘅生蠔，點解唔見咗？仲有呀，我塊黑豚肉呢？又係你食咗呀？」有時打邊爐落嘅食物，轉眼就會唔見咗，絕對唔係靈異事件，只係M佬食咗姐！所以我真係好鍾意一人一鍋形式嘅打邊爐，又唔驚佢落啲我唔鍾意食嘅嘢落去，破壞我嘅湯底！好多人覺得一人一鍋嘅打邊爐價錢都相對貴少少，但位於銅鑼灣嘅包羅萬有（萬友）火鍋就打破慣例，價錢抵食兼任飲任食，CP值超高呀！

湯底
包羅萬有（萬友）火鍋提供接近10款嘅湯底選擇，加上餐廳主打1人1鍋，可按自己喜好揀選心水湯底！選擇分別有特式川味麻辣湯、養生藥膳醉雞湯、正宗越式牛骨湯、溫補椰子雞湯、秘製沙嗲湯、芫荽皮蛋豆腐鍋，連1人1鍋非常少見嘅老壇酸菜魚片湯都有，夠晒驚喜！而我哋就揀咗暖笠笠胡椒豬肚湯同蕃茄薯仔洋蔥豬骨湯，店員建議我哋可以喺打邊爐前飲啖湯，湯底唔會太鹹，非常清淡，唔似有落味精，抵讚！

食物自取區
包羅萬有（萬友）火鍋主打抵食價錢，店主為咗唔想將貨就價，所以食物自取，以減省人手費用。雖然食物自取，但我哋又幾鍾意呢個安排，至少唔怕漏單，又可以自取相應份量！餐廳嘅食物選擇唔少，除咗豚肉同牛肉之外，連羊肉都有呀！當然唔少得丸類、牛柏葉、水魷同菜等等嘅選擇，餐廳嘅人流唔少，所以食物都會keep住refill，非常新鮮！而講到最新鮮係啲菜呀，超鮮甜又爽脆！另外，餐廳仲提供少量熟食，每晚款式不同，今晚就有乾煸四季豆、避風塘雞翼、薯角等等，等你可以食住等火鍋料淥熟之餘，仲啱晒送啤酒添！

飲品
呢到嘅飲品係另一個抵讚嘅位！除咗罐裝同無糖茶之外，仲有自家製嘅凍檸茶同凍奶茶，全部都係無限任飲架！

甜品
作為打邊爐嘅餐廳，餐廳大部份出品都未能考慮廚師嘅功力，所以推出自家製甜品，其中班蘭椰汁糕就係餐廳嘅招牌！食完打邊爐之後，班蘭椰汁糕真係可以消油解膩，加上甜度適中，非常高水準！

包羅萬有(萬友)火鍋
地址：銅鑼灣謝斐道496號金利文廣場1樓
電話：+852 3956 3128
營業時間：星期一至日 12:00 – 22:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com