一個男人嘅浪漫，米線陣獨嘆冬蔭功雞肉火鍋
話說，A姐留低咗包出前一丁比我，仲寫低咗張紙條，紙條係咁講嘅：
「M佬，我今晚約咗班姊妹食Buffet，你就留喺屋企煮出前一丁，乖乖寫稿啦！」
太過份喇！點解唔係出前一丁麻油味架？唔係麻油味，我唔食架囉！
而我係絕對唔會向惡勢力低頭，我係唔會屈服架！我決定食我最鐘意嘅打邊爐！但係一個人買料又唔多選擇，去酒樓任食又唔食得幾多，仲要另計湯底同茶醬費。但我係唔會放棄架，我絕對唔會番屋企煮出前一丁架！行過三大快餐店，又覺得無乜新意。直到我遇上佢 – 米線陣！
乜原來出名食米線嘅米線陣都有打邊爐架？仲有全新推出嘅泰式農村帽子雞鍋，咁就一於入去試吓先得啦！
望住個餐牌，帽子火鍋？唔明！直到個鍋上台，原來係鍋中鍋！中間係湯底，配料就放晒喺鍋的外圍，份量十足！跟餐有十幾款配料，包括菜肉餃、扎肉、牛丸、魚蛋、油炸鬼、豆卜、番茄、蘿蔔、鮮冬菇、同米線！好似我M佬呢啲大胃王都無問題！
等到個湯一滾，第一件事當然就要試吓個湯底先啦！湯底用上香濃嘅冬陰功，酸辣味道啱啱好，夠哂醒胃！
至於跟餐嘅十幾款配料都係大路貨色，中規中距啦。其中，最驚喜係個雞，夠哂嫩口，好滑呀！而咁多配料當中，油炸鬼同豆卜就最深得我心，完完全全吸收哂湯嘅精華，好好味呀！如果咁多配料都唔夠食，仲可以追加火鍋配料：鮮蝦雲吞、唐生菜、金菇、木耳同薯粉等，樣樣都係$10-$16就有交易。而M佬最推介嘅就係大大粒嘅蟹籽肉丸，秘製過又加入粟米，唔肥膩之餘又夠哂彈牙！
而跟餐仲有一杯特飲添！包括水蜜桃茉莉花茶、青瓜豆漿、青檸梳打、椰汁紅豆冰、忌廉菠蘿梳打添。而今期仲有限定嘅圓肉紅棗蜜同肉桂蘋果蜜，啱哂打完邊爐滋潤一吓！我哋就推介芒果鐵觀音，飲落唔算好甜，同茶味好夾。
所以話，男人嘅浪漫，豆腐火腩飯？計我M紅佬話齋，一個人快餐店打邊爐先稱得上係男人嘅浪漫！
米線陣
地址：樂富聯合道198號樂富廣場1樓1112號號舖
營業時間：星期一至日 11:00-23:00
電話：+852 2760 7817
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
報料或合作：aandmdiaryhk@gmail.com
